Паказаўшы добрую гульню на родным стадыёне, футбалісты «Нёмана» не здолелі выстаяць перад дзеючым чэмпіёнам краіны барысаўскім БАТЭ і саступілі з лікам 0:1. Аўтарам галявога мяча на 67-й хвіліне стаў Міхаіл Гардзяйчук.
Матч у Гродне быў вельмі важны для абедзвюх каманд і перамога давала многае. Для барысаўчан гэта ў першую чаргу магчымасць скараціць адставанне ад «Шахцёра», які ўзначальвае турнірную табліцу. А гродзенцам тры ачкі далі б магчымасць падняцца на трэцяе месца ў турнірнай табліцы і абысці БАТЭ. Нічыя б супернікаў не задаволіла.
За супрацьстаяннем прыйшла паглядзець рэкордная колькасць гледачоў у гэтым сезоне — прыблізна 5 000 чалавек. I прыйшлі гродзенцы паглядзець не на чэмпіёна краіны, а менавіта на родную каманду, якая з пачатку сезона паказвае добры футбол.
З самага пачатку матчу барысаўчане завалодалі ініцыятывай і вялікімі сіламі ішлі наперад. Гродзенская абарона дзейнічала ўпэўнена і не дазваляла суперніку нават прабіць па варотах. Першы небяспечны момант у варот гродзенцаў паўстаў толькi на 18-й хвіліне. Стасевіч амаль з лінii штрафной меў добры шанец для ўзяцця варот, але ў паўабаронцы БАТЭ ўдар не атрымаўся.
Праз 10 хвілін госці мелі чарговы небяспечны стандарт і зноў рэалізацыя падвяла барысаўчан.
Пад канец першага тайма каманды сталі больш актыўнымі, але акрамя далёкіх удараў гульцы супернікаў нічым не вызначыліся.
Другую палову матчу ўжо пачалі актыўна гродзенцы, але вось стварыць небяспеку каля варот БАТЭ ім не ўдавалася. Не хапала камандзе Ігара Кавалевіча завяршэння. Госцi ж здолелi скарыстацца сваім шанцам на 67-й хвіліне. Пасля паса Радзівонава, Гардзяйчук дакладна прабіў па варотах Журава і адкрыў лік у матчы.
Пасля прапушчанага мяча гродзенцы ўсімі сіламі пайшлі наперад. Кавалевіч ва ўзмацненне выпусціў на поле Яроцкага і Лакцiёнава.
На 75-й хвіліне быў добры шанец зраўняць лік у Хвалько, але яго ўдар галавой прыйшоўся прама ў рукі галкіперу гасцей.
Да канца матчу гродзенцы аддавалі апошнія сілы, каб зраўняць лік і парадаваць заўзятараў, але шматлікія спробы жоўта-зялёных выніку не прынеслі. БАТЭ здолеў утрымаць лік і чарговы раз абыграць гродзенцаў на іх родным стадыёне. Нягледзячы на паразу «Нёмана», гледачы на стадыёне праводзілі сваю каманду ў падтрыбуннае памяшканне пад апладысменты.
Ігар Кавалевіч пасля матчу пракаментаваў гульню сваёй каманды:
«Пры досыць роўнай гульні мы прайгралі, удача была на баку БАТЭ. Віншую БАТЭ з перамогай. У спорце без поспеху не абысціся. Былі моманты, каб давесці справу да гала. Добра разганялі атакі, але не было лагічнага завяршэння. Я задаволены, як мы граем з лідарамі чэмпіянату. Ды і гульнёй я сёння задаволены, рухаемся далей. Прапусцілі досыць кур’ёзны гол, гэта гульня».
Пасля паразы ад БАТЭ каманда Ігара Кавалевіча апусцілася ў турнірнай табліцы на 5-е месца (24 ачкі) і прапусціла наперад «Слуцк» (25 ачкоў).
Наступны матч «Нёман» правядзе на выездзе. У панядзелак 3 ліпеня гродзенцы ў Салігорску згуляюць з «Шахцёрам», які на дадзены момант узначальвае турнірную табліцу (35 ачкоў).
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Некалькі сотняў Дзядоў Марозаў, Снягурак, сабачак, вавёрачак і разнастайных іншых персанажаў 20 снежня прайшлі ад…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…