«Аднавіць рысы іх твараў». Гродзенскія яўрэі правялі «Марш Жыцця»

Напярэдадні Дня памяці ахвяр Халакоста і герояў яўрэйскага супраціву ў Гродне 23 красавіка прайшоў «Марш Жыцця». Удзел у ім прыняло каля 70 чалавек.

Штогод 27-га чысла месяца нісан па іўдзейскім календары (у гэтым годзе ён выпадае на 23−24 красавіка) у Ізраілі і дыяспарах па ўсім свеце адзначаецца Дзень Катастрофы і гераізму еўрапейскага яўрэйства. У 2017 годзе цырымоніі памяці ахвяр Катастрофы праходзяць пад дэвізам «Аднавіць рысы іх твараў».

У Гродне мясцовая яўрэйская абшчына правяла «Марш Жыцця», у якім прынялі ўдзел прадстаўнікі каталіцкай і пратэстанцкай цэркваў, а таксама генеральны консул Польшчы ў Гродне Яраслаў Ксёнжэк.

Марш прайшоў з трыма прыпынкамі (уваход у гета, музей гісторыі рэлігіі і сінагога), дзе ўдзельнікі чыталі і казалі пра Халакост і супраціў яўрэяў падчас Другой сусветнай вайны. А таксама пра тое, каб у будучыні чалавецтва не дапусціла нiякага генацыду.

«Такі марш памяці мы праводзім ужо трэці раз. „Марш Жыцця“ гэта не проста назва. Мы ідзем па вуліцах, дзе жылі і працягваюць жыць яўрэі, дзе працягваецца развіццё яўрэйскай абшчыны Гродна. У апошнюю вайну вялікую мясцовую абшчыну амаль цалкам знішчылі. I сёння падчас маршу мы спыняемся і ўспамінаем тых ні ў чым не вінаватых гараджан, якіх спасцігла злая доля», — сказаў на мерапрыемстве мінскі рабін Рыгор Абрамовіч.

[irp posts="2690″ name="Выжыў толькі адзін працэнт. 75 гадоў таму гродзенскiх яўрэяў сагналі ў гета каб знішчыць"]