У Гродне сёння сустрэлі дзесяцітысячнага бязвізавага турыста — грамадзянку Літвы, Зінаіду Мішкінене, паведамляе БЕЛТА. Сімвалічны падарунак жыхарцы Вільнюса Зінаідзе Мішкінене ўручыў намеснік начальніка аддзела адукацыі спорту і турызму Гродзенскага гарвыканкама Яўген Ародзь.
Па словах турысткі, аб экскурсіі ў Гродна яна даведалася выпадкова. «Паехала і не пашкадавала, — прызналася Зінаіда Мішкінене. — У Беларусі апошні раз была яшчэ ў савецкія часы, а цяпер ўбачыла прыгожы горад, чысты, цікавы сваімі гістарычнымі аб’ектамі». Цяпер яна будзе рэкамендаваць бязвізавыя экскурсіі ў Гродна і сваякам, і знаёмым.
«Яшчэ сезон не пачаўся, а мы ўжо прынялі 10 тысяч турыстаў, якія наведалі Гродзенскі рэгіён без візы, — адзначыў Яўген Ародзь. — Мы бачым, што Гродна папулярны ў суседзяў, у жыхароў іншых краін. Колькасць турыстаў з кожным тыднем павялічваецца». За першыя два месяцы 2017 года экспарт турыстычных паслуг у параўнанні з аналагічным перыядам 2016 года ўзрос на больш чым 70 тысяч еўра. «Па дадзеных тураператараў, на лета забраніраваны ледзь не ўсе нумары ў гатэлях і хостэлах. Актыўна паляпшаецца турыстычная інфраструктура, будуюцца новыя аб’екты для пражывання, грамадскага харчавання, развіваецца рух для турыстаў, з’яўляюцца новыя інфармацыйныя таблічкі, сэрвісы», — распавёў Яўген Ародзь. Поўную інфармацыю аб магчымасцях бязвізавага Гродна турысты могуць даведацца на сайце grodnovisafree.by.
Указ № 318, які дае права замежным турыстам наведваць без віз тэрыторыю спецыяльнага турысцка-рэкрэацыйнага парку «Аўгустоўскі канал», уступіў у сілу 26 кастрычніка. Дакумент прадугледжвае магчымасць бязвізавага ўезду тэрмінам на пяць сутак на тэрыторыю парку і ў прылеглыя населеныя пункты Гродзенскага раёна і Гродна. Такім правам скарысталіся ўжо 10 тыс. Іншаземцаў. Большасць з іх — турысты з Польшчы і Літвы.
