Напярэдадні Міжнароднага жаночага дня карэспандэнт Hrodna.life пагутарыў з мужчынамі на вуліцах Гродна і даведаўся, якія падарункі яны рыхтуюць у гэтым годзе для сваіх жанчын, і ці змяніўся ў гродзенцаў бюджэт на падарункі ў параўнанні з мінулым годам.
Андрэй
– Мой бюджэт не змяніўся, так што падарунак не будзе горш, чым летась, хоць тады было пару бонусаў. Па стандарце падару кветкі каханай дзяўчыне, а таксама планую падараваць сертыфікат на якія-небудзь паслугі, а якія, яшчэ не вызначыўся.
Алег
– 8 сакавіка гэта ўжо традыцыя ў нашай сям’і. Пакуль ёсць час, я яшчэ выбіраю падарункі – грошы на гэта ёсць. Адназначна падару кветкі, а вось асноўны падарунак будзе на рублёў 30-40.
Дзяніс
– Дарыць падарункі розным дзяўчатам не планую. Адзінае, што зраблю ў гэтае свята, дык гэта падару кветкі маме. Так бюджэтна, таму што я студэнт.
Уладзімір
– Усе кажуць, што лепшы падарунак у гэты дзень – вясновыя кветкі. Але я мастак і паспрабую парадаваць сваіх жанчын не кветкамі, а працамі, якія раблю сам. Кветкі гэта часова, а карціны, напрыклад, на доўгія гады. Лепшы – падарунак, які зроблены сваімі рукамі.
Аляксандр
– Сваёй жонцы я ўжо зрабіў падарунак на 8 сакавіка – гэта наш маленькі дзіцёнак. Таксама планую парадаваць яе кветкамі і ўсім тым, што яна захоча. Верагодней за ўсё, гэтае свята мы адзначым добрай вячэрай.
Сяргей
– Бюджэт на падарункі мой трохі змяніўся ў параўнанні з мінулым годам. Але ведаю дакладна, што буду дарыць кветкі, магчыма, яшчэ які-небудзь срэбраны пярсцёнак.
Канстанцін
– Я не тутэйшы і дзяўчыны ў мяне няма, так што нічога дарыць не буду. Адзінае светлае ў гэты дзень гэта тое, што ў маёй мамы Дзень нараджэння. Вось для яе падрыхтую вялікі падарунак.
Сяргей
– Падару кветкі і што-небудзь салодкае. Грошай усё менш, так што дарагія падарункі засталіся ў мінулым. Раней у гэтае свята я мог сабе дазволіць і золата набыць, цяпер абмяжоўваюся ва ўсім.
Алег
– Я студэнт і ёсць фінансавыя абмежаванні. Будзем прытрымлівацца традыцыі і дарыць стандартныя падарункі. У гэты дзень мама і каханая дзяўчына атрымаюць прыгожыя кветкі і смачныя цукеркі.
Уладзімір Андрэевіч
– Падарунак у гэты дзень дарыць нікому не збіраюся, гэтае свята я не прызнаю, бо я веруючы чалавек. Сапраўднае свята для жанчын адзначаецца ў другую нядзелю пасля Вялікадня. А то што святкуюць 8-га сакавіка, гэта свята прыдуманае, і усясветным яно стала зусім нядаўна.
Яўген
– З кожным годам грошай усё менш, але без кветак у гэтае свята ніяк нельга. Планую яшчэ падарункі якія-небудзь, але выбраць пакуль складана. Магчыма гэта будуць сертыфікаты на розную прадукцыю. Магу дакладна сказаць, што зраблю падарунак у 100 долараў дачцэ – у яе хутка вяселле.
Уладзімір
– Грошай няма, буду дарыць толькі кветкі. Раней мы шыкавалі і ні ў чым сабе не адмаўлялі ў гэтае свята. Было заўсёды і золата, і шмат руж. Зараз жа толькі цюльпаны. Засмучаны гэтым становішчам, і самае крыўднае, што з кожным годам усё горш і горш – перспектыў няма. Але галоўнае, што нашы жанчыны разумеюць сітуацыю з фінансамі і прымаюць нас такімі, якія мы ёсць.
