Футбольны «Нёман» у суботу 18 лютага правёў у новым гродзенскiм манежы першы матч. Памерацца сіламі з камандай Ігара Кавалевіча прыехаў мінскі «Прамень», які выступае ў Першай лізе. Супернікі правялі добры матч, але перамога дасталася больш дасведчаным футбалістам з Гродна.
Матчу ў манежы чакалі шматлікія аматары футбола ў Гродне. Паглядзець на новабуд і на новую гродзенскую каманду прыйшло каля 200 чалавек. Хоць афіцыйнага адкрыцця футбольнага манежа не было, галоўная каманда горада ўжо актыўна трэніруецца там. Афіцыйна манеж плануюць адкрыць 23 лютага
У гульні з «Праменем» гродзенцы выступалі наступным складам:
Курганскі (Шышлаў, 46), Бебе (М.Яблонскi, 36), Хвалько (Горбач, 61), Анюкевiч (Абуна, 46), Валовік (Наско, 46), Якімаў, Савіцкі (Журневiч, 61), Жукоўскі (Яроцкі, 46), Канавалаў (Цэслюкевiч, 46), Сянкевіч (Клімовіч, 46), Лакціёнаў (Канцавы, 46).
«Нёман», як гаспадар, актыўна пачаў матч і гэта прынесла вынік. Ужо на 2-й хвіліне навабранец гродзенцаў Жукоўскі эфектна са штрафнога адправіў мяч у вароты «Праменя». Ужо да 30-й хвіліны ўсё той жа Жукоўскі пасля паса яшчэ аднаго навабранца Лакцiёнава афармляе дубль. А праз дзве хвіліны забівае і сам Лакціёнаў, у ролі асістэнта ў яго выступіў Савіцкі.
Другі тайм госці сталі гуляць больш сур’ёзна і смялей, атакі ля варот Шышлава станавіліся ўсё больш небяспечнымi. У выніку актыўнай гульні «Прамень» здолеў размачыць вароты «Нёмана». Зрабіў гэта на 62-й хвіліне Архіпаў. Гродзенцы ў другой палове матчу таксама мелі добрыя моманты каля варот супернiка, але вызначыцца ў гульні больш нікому не ўдалося.
Неман — Луч (Д2) — 3:1 (3:0)
Пасля матчу галоўны трэнер гродзенцаў Ігар Кавалевіч адзначыў, што ў гульні з «Праменем» не было цэласнасці.
— Гульня з «Праменем» не склала цэласнага ўяўлення. Калі ў першым тайме атрымлівалася ажыццяўляць некаторыя напрацоўкі, то другі тайм быў зусім іншым і не змог даць інфармацыю пра гульцоў, бо мы змянілі цалкам увесь склад.
— Што можаце сказаць пра тых гульцоў, якія знаходзяцца на праглядзе ў камандзе?
— На прагляд у клуб прыехаў Аляксей Валовік, але мы, думаю, адмовімся ад яго паслуг. Што ж тычыцца легіянераў, то іх трэба падпісваць для гульні ў асноўным складзе. Па гэтай прычыне Канавалаў цяпер не будзе выступаць за «Нёман», бо я не магу гарантаваць яму месца ў аснове, таму што на яго пазіцыі ёсць Яроцкі і Клімовіч, так што да варыянту з яго падпісаннем мы вернемся ў летняе трансфернае акно. Адмовімся мы і ад падпісання кантракта з камерунцам Абунай, бо Анюкевiч на яго пазіцыі выглядае лепш.
У вынiку ўдалай гульнi з «Праменем» «Нёман» атрымоўвае чарговую перамогу ў міжсезонне. Зараз баланс сустрэч у каманды, выглядае так: +3=1−2, мячы 10−7.
Наступную таварыскую гульню каманда Iгара Кавалевiча правядзе таксама ў Гродне, дзе будзе прымаць ФК «Лiда». Матч пройдзе 22 лютага ў манежы.
