Па слядах пажару на Ціміразева: «Збіраўся раніцай забраць машыну з рамонту, а яна ноччу згарэла».

Пакуль супрацоўнікі МНС разам са следчым камітэтам высвятляюць дакладныя прычыны пажару, што здарыўся ноччу 13 літстапада ў гаражах на Ціміразева, арандатары і ўладальнікі аб’екта ацэньваюць страты.

Нагадаем, ноччу 13 лістапада па вуліцы Ціміразева, па папярэдняй версіі з-за парушэнню правілаў эксплуатацыі печы, гарэла вялікая пабудова, дзе знаходзіцца 14 гаражоў. 10 з іх палалі, бо мелі драўляны дах, чатыры іншых, якія былі накрыты жалезабетонам, практычна не былі пашкоджаныя.

Арандатар гаражоў, якія не падвергліся агню, распавёў, што рана ці позна пажар павінен быў адбыцца.

«Гэта ўсё было прадказальна. Асабліва з іх самаробнай печчу і наплявальніцкім стаўленнем да ўсіх іншых арандатараў. З-за адных пацярпелі ўсе. Але нам яшчэ пашанцавала, што ў нас жалезабетоннае перакрыцце. У іншых гаражах дзве машыны згарэлі цалкам, тры машыны былі падплаўлены. Таксама дасталося і тром аўтобусам, якiя позна выпхнулі. У першым гаражы стаяць новыя квадрацыклы ў каробках — іх ужо не прадаць, бо ўсе моцна смярдзяць гарам», — распавёў арандатар.

Пажар, які пачаўся каля 2 гадзіны ночы, скончылі тушыць толькі каля 6-й раніцы. Сведкі кажуць, што адзін з уладальнікаў, убачыўшы свой згарэлы аўтамабіль, пачаў плакаць. Уладальнік другой знішчанай машыны таксама быў засмучаны: у гэты дзень ён планаваў забраць транспарт з рамонту.

«Што цяпер зробіш? Добра што ўсе жывыя. Мне ноччу патэлефанавала жонка майго сябра і сказала, што мая машына гарыць. Я адразу не зразумеў, што адбываецца. Ноччу прыехаў і быў шакаваны ўбачаным.

Хлопец, які рамантаваў аўтамабіль, расказаў, што ён вырашыў падліць масла ў печку. Калі ён гэта зрабіў, то агонь пачаў моцна палыхать і трапіў на канапу, якая імгненна загарэлася. Хлопец хацеў машыну выпхнуць, але не змог. Тады пабег за вогнетушыцелем, а калі прыбег, то ўсё ўжо гарэла", — распавёў уладальнік згарэлага аўтамабіля Анатоль.

Вядома, што хлопец, які рамантаваў машыну, быў не адзін. У гаражы з ім былі яшчэ хлопец і дзяўчына, якія ў час пажару ўцяклі, а да гэтага пілі там. Хлопец, які спрабаваў тушыць агонь, думаў, што ў агні засталася дзяўчына. Яе шукалі пад абломкамі і попелам да раніцы, але пасля яна знайшлася ў інтэрнаце.