Двух гродзенцаў прызналі ўдзельнікамі экстрэмісцкіх фармаванняў. У Слоніме за фота татуіроўкі затрымалі пару. Пенсіянера Васіля Дземідовіча судзяць восьмы раз. Рэдакцыя Hrodna.life вывучыла, што адбылося ў вобласці з 13 па 19 траўня.
Суды за распаўсюд экстрэмісцкіх матэрыялаў
Аб 13 судовых рашэннях за распаўсюд экстрэмісцкіх матэрыялаў стала вядома на мінулым тыдні. Суды прайшлі ў Гродне, Лідзе, Іўі. Судзілі лекараў, майстра перманента і пастыра.
Новая экстрэмісцкая інфармацыя
- TikTok-акаўнт «pandovan4ik»,
- TikTok-акаўнт «vola0520» і яго лагатып.
Іх прызнаў экстрэмісцкімі суд Лідскага раёна 8 траўня.
Двух гродзенцаў прызналі ўдзельнікамі экстрэмісцкіх фарміраванняў
КДБ 8 траўня прызнаў экстрэмісцкімі фармаваннямі «Аб'яднанне палітычных партый «Народная Грамада» і «Беларуская Хрысціянкая Дэмакратыя» «Салідарнасць» і/ці «Солидарность». Сярод удзельнікаў - гродзенскія актывісты Яўген Дудкін і Сяргей Верамеенка.
![Яўген Дудкін у Гродзенскім абласным судзе](https://ru.hrodna.life/wp-content/uploads/2020/09/2020-09-22_dudkin_001-1024x768.jpg)
![Сяргей Верамеенка ў сваёй краме "Адметнасць" у Гродне.](https://ru.hrodna.life/wp-content/uploads/2024/03/signal-2020-08-25-144312_007-20200825-VDV-1-800x527.jpg)
У Слоніме за фота татуіроўкі затрымалі пару
За фатаграфію татуіроўкі ACAB затрымалі мужчыну на хатняй хіміі за распаўсюд наркотыкаў і яго дзяўчыну, судзімую за хуліганства з адтэрміноўкай. Тату хлопец набіў у 2015 годзе.
![Затрыманая пара ў Слоніме. Скрыншот Hrodna.life](https://ru.hrodna.life/wp-content/uploads/2024/05/Zaderzhannaja-para-v-Slonime.-Skrinshot-1-800x495.webp)
![Затрыманая пара ў Слоніме. Скрыншот Hrodna.life](https://ru.hrodna.life/wp-content/uploads/2024/05/Zaderzhannaja-para-v-Slonime.-Skrinshot-2.webp)
Пенсіянера Васіля Дземідовіча судзяць восьмы раз
Ён абвінавачваецца ў арт. 369 КК «Абраза прадстаўніка ўлады» і арт.391 КК «Абраза суддзі». Справу будзе разглядаць суддзя Алег Лагачоў 20 траўня ў Крупках.
Гэта ўжо восьмы суд над пенсіянерам. Усяго яго асудзілі на сем гадоў пазбаўлення волі, пры гэтым вынік апошніх трох судоў пакуль невядомы. У зняволенні Васіля Іванавіча ўтрымліваюць амаль два гады, паведамляет «Вясна».
![Васіль Дземідовіч. Фота: "Вясна"](http://ru.hrodna.life/wp-content/uploads/2023/02/Vasilij-Demidovich.-Foto-Vjasna.jpg)
Былы палітвязень і яго жонка з Гродна адкрываюць у Вільні краму і творчую прастору
Гродзенцы Зміцер і Вольга Фурманавы адкрываюць у цэнтры Вільні краму і творчую прастору «Kropka». Там будуць прадаваць рамесныя вырабы і праводзіць майстар-класы і выставы. На першы бізнес пару натхніла чаканне дзіцяці.
![Зміцер і Вольга Фурманавы](http://hrodna.life/wp-content/uploads/2024/05/furmanavy_-800x800.webp)
«Высокая небяспека для грамадства». У Іўі за падпіскі аштрафавалі пастыра
За распаўсюд экстрэмісцкіх матэрыялаў у Іўі судзілі пастыра. Верагодна, гаворка ідзе пра Юрыя Гардзея, пастыра царквы хрысціян веры евангельскай «Божая ласка». Яго аштрафавалі за падпіску ў «Аднакласніках».
![Юрый Гардзей.](http://hrodna.life/wp-content/uploads/2024/05/Jurij-Gordej.-Foto-800x533.webp)
Натарыус адмовіўся рабіць даверанасць для гродзенца са спісу «тэрарыстаў». Той паскардзіўся ў суд
Беларуса асудзілі паводле некалькіх артыкулаў - у тым ліку за тэракт. Ён адбывае пакаранне ў калоніі або турме. Мужчына звярнуўся да натарыуса, каб скласці даверанасць на адваката і жонку. Яму адмовілі праз тое, што мужчыну ўнеслі ў спіс «тэрарыстаў».
У актывісткі страйкама з Гродна на радзіме арыштавалі маёмасць
На актывістку страйкаму «Гроднапрамбуд» Юлію Сліўко завялі новую крымінальную справу. У Беларусі ў яе арыштавалі маёмасць, да якой, па яе словах, яна не мае дачынення. Пра сітуацыю яна распавяла ў Facebook.
![Юлія Сліўко](http://hrodna.life/wp-content/uploads/2024/05/julija-slivko-8-1-800x522.jpg)
Ва ўдзельнікаў святкавання Дня Волі за мяжой абяцаюць забраць маёмасць у Беларусі
Удзельнікаў акцый на Дзень Волі 25 сакавіка 2024 года ў розных гарадах замежжа беларускія сілавікі прызналі падазронымі па паводле двух артыкулаў Крымінальнага кодэкса. Людзям, уключаным у спіс Следчага камітэта, пагражае канфіскацыя маёмасці, якая належыць ім у Беларусі.
Дыджэй з Гродна выступіць на дабрачынным фэсце ў Варшаве — каб дапамагчы дзецям палітвязняў
Дыджэй з Гродна Schmoltz выступіць на дабрачынным фестывалі Belarus Outside Sound System. Там будуць збіраць грошы для дзяцей беларускіх палітвязняў. У фестывалі бяруць удзел 14 артыстаў, і кожны прадставіць сваю новую праграму або новую частку свайго жывога выступу.
![Дыджэй Schmoltz.](http://hrodna.life/wp-content/uploads/2024/05/fest-varshava__1-800x556.webp)
Гродзенца Георгія Роя абвясцілі ў вышук у Расіі
Гродзенскі святар Георгій Рой, які летась з’ехаў з Беларусі, патрапіў у расійскую базу крымінальнага вышуку. Раней на яго завялі крымінальную справу ў Беларусі, паведаміў святар Hrodna.life.
Таксама туды трапіў актывіст Ежы Грыгенча.
![Праваслаўны святар Георгій Рой у Гродне. Цяпер ён працуе ў Беларусі праваслаўны прыход у Вільні](http://hrodna.life/wp-content/uploads/2021/07/Georgij-Roj-kniga-8-1-800x450.jpg)
Суд пакінуў без разгляду пазоў супраць Бондаравай: справу вырашылі мірна
Эканамічны суд Гродзенскай вобласці пакінуў без разгляду пазоў гродзенскага сайта Grodno.in супраць праўладнай актывісткі Вольгі Бондаравай. Бакі пагадзіліся вырашыць справу праз медыятара.