«Прывітанне, гэта не спам». Так пачынаўся ліст, што у 2010 атрымала Алена Анатольеўна Майсюк з Гродна ад Алены Анатольеўны Майсюк з Масквы. З яго ўзяло пачатак знаёмства дзяўчат-двайнікоў. У студзені 2019 яны сустрэліся ў рэале і высветлілі, што акрамя аднаго на дваіх імя яны маюць шмат іншых агульных інтарэсаў у жыцці.
— Майсюк — прозвішча майго мужа, маім яно стала толькі ў 2001 годзе. Ён сам не так шмат ведаў пра сваіх продкаў, памятаў толькі, што дзед быў з Мінска, бабуля з Сібіры, і з’ехалі яны будаваць ваенную грузінскую дарогу ў Грузію. Там ён нарадзіўся і вырас.
У пэўны момант мне спатрэбілася зрабіць электронную пошту, пішу maisuk — занята … скапіравала ў пашукавік, цікава ж, хто гэта такі разумны заняў патрэбную мне пошту. Так наткнулася на сайт Лены з Гродна. Мяне тады ўразіла не толькі супадзенне імёнаў, а тое, што нават нік у інтэрнэце ў нас апынуўся практычна аднолькавым. Гэта наогул фантастыка … У мяне быў Ginger, а ў Лены — Gingernut. Так, мы абедзьве былі рудыя і з кароткай стрыжкай. Бландынкай з карэ я стала толькі 5 гадоў таму, — расказвае Лена з Масквы.
З яе словаў, праз прыродную жаночую цікаўнасць вырашыла напісаць двайніку і пазнаёміцца.
«Мы не дадаваліся у сябры ў сацыяльных сетках, я не ведала, як Лена можа выглядаць. У нейкі момант нават падумала, а раптам гэта я сама сабе пішу лісты, ведаеце, як у кіно, — расказвае пра пачатак знаёмства Лена з Гродна.
Аднойчы ў лісце з Масквы Лена пісала, што пабачыла мой здымак, і адгадала, дзе ён быў зроблены.
Я была здзіўлена. Ну як па адлюстраваннях дрэваў у вадзе можна зрабіць выснову пра месца здымкі? Магчыма, гэта сведчыць, што мы вылучаем навокал вельмі падобныя рэчы.
Яшчэ з дзяцінства я марыла, каб ў мяне была сястра-блізнец, або старэйшая сястра. Але насамрэч ў мяне брат. Лена з Масквы стала ўвасабленнем маёй мары.
І вось раптам мяне запрашаюць у госці ў Маскву. Зноў я ўспамінаю Лену і вырашаю паспрабаваць сустрэцца. Цікава яшчэ і тое, што калі я раней прыязджала сюды, то гасціла ў тым самым раёне, дзе жыве Лена. Але сустрэліся мы толькі 4 студзеня 2019 года.
«Пры сустрэчы мы пасмяяліся, тры гадзіны прагаварылі, як быццам даўно знаёмыя. Дзяліліся ўражаннямі, расказамі аб паездках, планамі. Супер усё было, класна», — распавядае Лена з Масквы.
Лена з Гродна кажа: «Адчуваю, што Лена «свой чалавек», з ёй можна размаўляць лёгка і спакойна, на любыя тэмы. Яна вельмі пазітыўная і любіць пазнаваць новае, развіваць свае ўменні.
«Лена аказалася творчым, вельмі цікавым чалавекам, — расказвае маскоўская Лена пра двайніка з Гродна. — Фатаграфіі, паездкі, столькі ўсяго рознага ў яе жыцці адбывалася! Гэта захапляла, таксама хацелася ў дарогу … У мяне сям’я, дзеці - не заўсёды ёсць магчымасць ірвануць некуды, як яна. Але! Зараз дзеці выраслі, ўжо спраўляюцца самастойна і ў мяне як крылы з’явіліся — шмат езджу, мару, планую падарожжы, спіс хацелак велізарны, як і ўвесь свет, зрэшты. Фатаграфаваць я таксама люблю, проста гэта не стала маёй прафесіяй. Затое на ўсіх святах і днях нараджэння фатограф звычайна я. Сапраўды, шмат агульнага. Вось такія мы падобныя, Алены Анатольеўны Майсюк».
«Мне зараз цікава ўбачыць тыя гарады, дзе была „маскоўская“ Лена. Можа нават атрымаецца калі-небудзь павандраваць разам. Мы пасябравалі ў фэйсбуку і надалей зможам аператыўна быць у курсе справаў адна адной», — кажа Лена з Гродна.
«Гэта сустрэча не апошняя. Зямля круціцца і мы абавязкова яшчэ ўбачымся, — упэўнена Лена з Масквы.
Гродзенская Лена згаджаецца: «Падаецца, праз адно на дваіх імя жыццё дало нам добрую нагоду для сяброўства».
Как покрасить яйца необычно? Из фиолетовой капусты можно получить изумрудный цвет, из вина получаются яйца,…
Беларускім студэнтам пачалі адмаўляць у візе для вучобы за мяжой. Тэрміны, на якія віза выдаецца,…
Каля 600 зваротаў, адпраўленых гродзенцамі або звязаных з Гродна, ёсць у базе зваротаў у КДБ.…
Гістарычны канал Hrodna 11:27 працягвае пераказваць, што пра жыццё ў Гродне пісала мясцовая газета "Echo…
У Гродне можна купіць некалькі бізнес-цэнтраў, запоўненых арандатарамі. Сярод іх - былое чыгуначнае дэпо пачатку…
Як выглядала жыццё ў Гродне стагоддзе таму? Даведацца пра падзеі і клопаты штодзённасці можна са…