Вежа-дазорца ў Крэве. Фотаздымкі Lena Shaturyna Bobina, канал "Сцежкі Беларусі"
Вежу-дазорцу, меркавана, частку сігнальнай сістэмы Вялікага Княства Літоўскага, урачыста адкрыюць у Крэве. Вежу збудавалі на сродкі прыватнай фірмы паводле гістарычных, археалагічных і архітэктурных даследаванняў. Адкрыццё драўлянай вежы-дазорцы запланаванае на 5 лістапада, 15.00.
У час мерапрыемства анансуюць сустрэчу з князем Альгердам, сярэднявечныя рыцарскія турніры і забавы і фаер-шоў. Арганізатар — Смаргоньскі гісторыка-краязнаўчы музей.
Архітэктар вежы — Андрэй Шулаеў, каардынатар праекта — дырэктарка Смаргонскага гісторыка-краязнаўчага музея Алена Бобіна, археалагічны нагляд здзяйсняў гісторык, археолаг Алег Дзярновіч. Узвядзенне турыстычнага аб’екта праспансавала ВКТАА «Фомар», якое займаецца аптовым гандлям машынамі і абсталяваннем для будаўніцтва.
Вежа — не толькі турыстычны аб’ект, але і прыклад вежавай сігнальнай сістэмы Вялікага княства Літоўскага.
Драўляную вежу на Юравай гары ў Крэве пачалі будаваць у верасні 2022 года. Усе працы выконваліся, наколькі магчыма, з ужываннем традыцыйных матэрыялаў і інструментаў, максімальна прыбліжана тэхнік, якія існавалі ў старажытнасці, расказвала дырэктарка Смаргонскага гісторыка-краязнаўчага музея Алена Бобіна. Агульнае кіраўніцтва праектам і каардынацыю дзеянняў яго ўдзельнікаў на ўсіх этапах яна здзяйсняла на дабрачыннай аснове, адзначаў у публікацыі «Светля шлях». Праект узгоднены з Мінкультам.
Годам раней на Юравай гары правялі даследванні археолагі пад кіраўніцтвам кандыдата гістарычных навук, старшага навуковага супрацоўніка Інстытута гісторыі НАН Беларусі Алега Дзярновіч. У 2012 годзе падчас раскопак на гэтым месцы даследчыкі натрапілі на каменныя канструкцыі. У 2021 годзе там выявілі мураваны падмурак пад драўляную канструкцыю, у 2022 праводзілі і геарадарныя даследванні. Даследчыкі прыйшлі да высновы, што на Юравай гары ў XIV ст. мог знаходзіцца сігнальны пост, дазорная вежа. Такая пабудова была патрэбна Крэўскаму замку, агляд з якога быў досыць абмежаваны. Пра сістэму такіх сігнальных агнёў на землях ВКЛ узгадвалі ў нямецкіх хроніках. Паводле альтэрнатыўнай версіі, там мог размяшчацца сакральны аб’ект, але сведчанняў гэтаму археолагі не знайшлі.
Вежа мае вышыню амаль 10 м. Сцены выкананыя з сасны, асобныя элементы, у тым ліку дзверы, — з дуба, чатырохскатны дах накрыты гонтай. Унутры пабудовы частка падлогі - са шкла, пад якім бачныя рэшткі падмуркаXIV ст., выяўленыя падчас раскопак. Адначасова на вежу можа падняцца да 10 чалавек.
Чытайце таксама:
Загадчыца аднаго з інтэрнатаў у Гродне не ўсачыла за тым, каб паддоны электраплітаў на кухні…
За чатыры гады колькасць пасажыраў гродзенскага аэрапорта знізілася за 99% – з 10 000 да…
Рабочага Белспажыўтаварыства збілі двое ДАІшнікаў - у іх аўтамабілі і кабінеце РАУС. Пра гэта ён…
У пяцёрцы самых прыбытковых вакансій – дырэктар, кіраўнікі зменаў і аддзелаў, а таксама маркетолаг. Hrodna.life…
На «Гродна Азот» і прадпрыемствах, у якіх ён выступае заснавальнікам, супрацоўнікам забароняць карыстацца смартфонамі і…
Двух адказчыкаў прызналі вінаватымі ў нядбалым стаўленні да службы, якое прывяло да цяжкіх цялесных пашкоджанняў…
