Гродзенскія ўніверсітэт і цэнтр культуры памяняліся будынкамі. Абодва плануюць буйныя рамонты

Будынак былога Гарадскога цэнтра культуры (а яшчэ раней — навучальна-вытворчага камбіната № 2) на вуліцы Паповіча, 50 плануюць мадэрнізаваць. Гродзенскі дзяржаўны ўніверсітэт імя Янкі Купалы шукае арганізацыю для кіравання і нагляда за працамі. Інфармацыю пра гэта апублікавалі на сайце дзяржзакупак.

ГрДУ хоча мадэрнізаваць будынак і рэканструяваць частку памяшканняў на першым паверсе. Таксама ў планах добраўпарадкаваць прылягаючую тэрыторыю. Рэканструкцыю правядуць за ўласныя сродкі ўніверсітэта.

Праектныя працы ідуць з лістапада 2021 года. Яны павінны скончыцца ў траўні 2022-га. Будаўніча-мантажныя працы запланавалі на кастрычнік 2022 года.

Куды падзеўся Цэнтр культуры?

Будынак на Паповіча, 50 пабудавалі ў другой палове 1980-х гадоў. Там размяшчаўся навучальна-вытворчы камбінат № 2. У 2014 годзе яго закрылі. Неўзабаве туды пераехаў Гродзенскі гарадскі цэнтр культуры. Памяшканні ў будынку здавалі ў арэнду прыватным прадпрымальнікам, рамеснікам, установам. У тым ліку — Гродзенскаму рок-клубу Ігара Банцэра. У 2021 годзе будынак перадалі на баланс ГрДУ.

Гродзенскі гарадскі цэнтр культуры, які раней знаходзіўся на Паповіча, 50, пераехаў у колішні палац культуры «Юнацтва» на Урублеўскага, 33, які яшчэ нядаўна займаў ГрДУ. Атрымліваецца, установы памяняліся будынкамі. Аднавіць сцэну ды іншыя памяшканні «Юнацтва» Гарадскі цэнтр культуры плануе да канца 2023 года. У будынку ўжо 12 год не было канцэртаў.