Мы сабралі для вас 6 галоўных правілаў эканомных вандровак. Не, спаць на вуліцы і тусавацца ля чорнага ўваходу ў рэстараны не прыйдзецца. Усё як мае быць у звычайным падарожжы. Толькі ў некалькі разоў танней.
Досведам дзеліцца журналістка Hrodna.life, якая за апошні год я наведала 4 краіны і 6 гарадоў і ў выніку зразумела, як можна было ашчадзіць у кожным выпадку.
У кожным з гарадоў знаходзілася штосьці з катэгорыі «А вось калі б ведала загаддзя…». Што яна вывучыла за гэты час?
Паехаць у расійскую сталіцу на выхадныя мне прапанавалі за тыдзень да адпраўлення. Набыць квіткі я вырашыла праз 2 дні. І гэта была самая дрэнная ідэя за ўвесь час!
Адкрыла ўсе вядомыя сайты са зніжкамі - ні адна ўжо не была актуальнай. Квіткі на аўтобусы разабралі, як гарачыя маскоўскія чабурэкі. Затое авіякампаніі сардэчна чакалі. Яшчэ б: шлях у адзін бок каштаваў 150 BYN.
У дзень адпраўлення, седзячы ў маршрутцы аўтавакзал-аэрапорт, з болем назірала, як адыходзіць аўтобус у Маскву. Ён мог быць і маім усяго за 50 BYN, а то і 20 BYN.
З таго часу я вырашыла планаваць паездкі загаддзя. Прасцей пасля падбіваць планы, абмінаючы дату падарожжа ў календары, чым у спешцы шукаць што патанней, каб увогуле выехаць.
Перад вандроўкай у Вільню я была ўпэўнена, што ўсе мясцовыя каўчсёрферы чакаюць такога госця, як я. За некалькі дзён да паездкі зразумела, што яны ўвогуле нікога не чакаюць. У людзей ёсць іншыя госці, іншыя планы. Прыйшлося шукаць таннае месца.
Кватэры з аб’яваў у інтэрнэце звычайна не зусім выгадныя для аднаго-двух вандроўнікаў. Добры варыянт — хостэлы. Канешне, у выпадках, калі замаўляюцца раней за дату паездкі. Таму мы спыніліся ў недарагім, але і не вельмі танным хостэле побач з вакзалам. Месца было зручнае. Але ўсё ж трып пайшоў не паводле плану.
Толькі па прыездзе дадому я даведалася, што ў гатэлях ёсць праграмы лаяльнасці. Напрыклад, сетка AccorHotels уключае шэраг гасцініц па ўсім свеце, у тым ліку, і Ibis Styles у Вільні. Ночыш у гатэлях на добрых умовах, атрымоўваеш балы і пасля «расплочваешся» імі за жыллё і паслугі партнёраў.
Балы можна атрымаць не толькі за начлег, але і за сняданкі і абеды ў гатэлі, а нават за сяброўства з экалогіяй! Папрасіў не прыбіраць у пакоі адзін дзень — атрымаў балы. Назбіраў 2000 балаў - маеш добрую зніжку на гатэль.
У еўрапейскіх гарадах кошт праезду ў грамадскім транспарце перавышае наш у некалькі разоў. Мясцовым бывае прасцей даехаць да патрэбнага месца на сваім аўто, чым выкарыстоўваць гарадскія лініі. Але нашто нам — турыстам — браць машыну?
Падчас шпацыру ў Ратэрдаме (дарэчы, надвор’е было добрае) вырашылі з сяброўкай адзін раз пад’ехаць два прыпынкі. За іх аддалі па 7 еўра! Карацей, больш у аўтобусы не садзіліся. Нават у дождж.
Праз некалькі няспынных гадзін перамяшчэння пешшу ўжо пачалі атрымоўваць асалоду. Можна спыніцца ў любы момант, зайсці ў вузкі дворык, схавацца ў краме, пасядзець ці падбегчы. А эканомія якая!
Піцер — горад вялікі і цікавы. Толькі па Неўскім праспекце будзеш шпацыраваць гадзіну ў адзін бок. А як наведаць усе славутасці за некалькі дзён?
Побач з кожнай славутасцю ёсць метро ці прыпынак. Гэта той выпадак, калі грамадскі транспарт зручна выкарыстоўваць. І зрабіць гэта можна адносна танна.
Кошт піцерскіх квіткоў з еўрапейскімі параўноўваць нельга. 45 расійскіх рублёў для нас былі ўвогуле капейкамі. Але з’ездіш пару разоў туды-назад — і добрая сума набяжыць.
Гэтым разам перад (!) паездкай я даведалася, як сэканоміць. Знаёмыя аматары вандровак расказалі пра «адзіны праязны», які можна набыць на 90 хвілін, дзень, два, тры, тыдзень, месяц — як заўгодна. І каштуе ён ад 65 рублёў. Звычайна праязныя выходзяць выгадней за разавыя квіткі па маршруце. Таму трэба заўсёды параўноваць прапанаваныя варыянты.
На адной з вуліц Амстэрдама на пару хвілін удалося пабыць у якасці экскурсантаў. Маглі б застацца з імі і да канца, але былі без ровараў.
Ведаеце гэтае неадольнае жаданне далучыцца да суполкі турыстаў так, каб вас не заўважыў экскурсавод? Мяне заўважыў. І прапанаваў працягнуць разам з імі. Аказалася, зусім бясплатна. Гэта была экскурсія ад ініцыятывы «City free tour».
Дарэчы, у адным з самых дарагіх еўрапейскіх гарадоў ёсць шмат бясплатных магчымасцяў для эканомных турыстаў: экскурсіі, музеі, паркі, бібліятэкі, аглядныя пляцоўкі. І ўся гэта інфа ёсць у інтэрнэце. Дастаткова патраціць 30 хвілін — і насычаная праграма на ўвесь адпачынак забяспечана.
Львоў лічыцца адным з самых танных напрамкаў для беларусаў. Менавіта таму кожны другі на плошчы Рынак у цэнтры — наш зямляк. Не дзіўным будзе сустрэць тут сяброў ці знаёмых. І калі аб’яднаца з імі ў адну вялікую кампанію — адпачынак выйдзе ўвогуле танным.
Кватэры ў горадзе здаюць з фіксаваным коштам. Напрыклад, аднапакаёўка недалёка ад цэнтра абышлася нам у 35 $ за ноч. Калі б яшчэ дваіх турыстаў «палажылі» на вольную канапу, атрымалася б тая ж сума на ўсіх.
З ежай таксама. Ва ўстановах немагчыма замаўляць шмат, таму што пасля вас чакаюць яшчэ з дзясятак такіх жа цікавых кафэ, рэстаранаў, бараў. Адной стравы на ўсіх, каб пакаштаваць, будзе дастаткова. А па цане на чалавека выйдзе менш, чым абед у сталоўцы каля работы.
Такім чынам, выязджаць за мяжу (і рабіць гэта рэгулярна) не абавязкова з вялікай колькасцю грошай і асабістым самалётам. Прастога жадання і мінімальнай эканоміі будзе дастаткова, каб зрабіць гэта ўжо ў наступныя выхадныя. Куды накіруецеся вы? Магчыма, у Вільню, каб ацаніць гасцінны гатэль Ibis Styles?
ТАА «Ірвінга Група»
УНП 191 751 509
Как покрасить яйца необычно? Из фиолетовой капусты можно получить изумрудный цвет, из вина получаются яйца,…
Беларускім студэнтам пачалі адмаўляць у візе для вучобы за мяжой. Тэрміны, на якія віза выдаецца,…
Каля 600 зваротаў, адпраўленых гродзенцамі або звязаных з Гродна, ёсць у базе зваротаў у КДБ.…
Гістарычны канал Hrodna 11:27 працягвае пераказваць, што пра жыццё ў Гродне пісала мясцовая газета "Echo…
У Гродне можна купіць некалькі бізнес-цэнтраў, запоўненых арандатарамі. Сярод іх - былое чыгуначнае дэпо пачатку…
Як выглядала жыццё ў Гродне стагоддзе таму? Даведацца пра падзеі і клопаты штодзённасці можна са…