Выява ілюстрацыйная. Калаж: Shoppingpl.com
З 17 траўня беларускія страхавыя кампаніі перастануць афармляць страхоўкі для выезду за мяжу па «Зялёнай карце». Узаемнае прызнанне страхавання па «Зялёнай карце» (Green Card) паміж больш чым 30 краінамі Еўропы і Беларуссю спыніцца 1 чэрвеня. Як будзем выязджаць за мяжу пасля гэтай даты і што рабіць, калі памежнік спытае страхоўку?
«Зялёная карта» — гэта страхаванне грамадзянскай адказнасці ўладальнікаў транспартных сродкаў. У выпадку ДТЗ за мяжой, калі будзе вінаваты застрахаваны, пацярпелы гарантавана атрымае кампенсацыю ад страхавой кампаніі. Агулам у сістэму «Зялёная карта» уваходзяць 48 краін.
Мінімальны тэрмін для страхавання машыны па «Зялёнай карце» — 15 дзён. Таму страхавыя агенты атрымалі загад не афармляць гэты тып полісаў ужо з 17 траўня, піша «Наша Ніва». Зараз «Зялёная карта» ў Беларусі каштуе 30 еўра.
Тым, у каго дзеянне такой страхоўкі скончыцца пасля 16 траўня, трэба будзе афармляць страхаванне ўжо ў іншых краінах. Полісы можна будзе аформіць пасля перасячэння мяжы. Калі ездзіць за мяжой без страхоўкі, кіроўцу чакае пакаранне.
У суседняй Польшчы мінімальны тэрмін, на які можна аформіць страхоўку — 30 дзён. Яе кошт — 37 еўра. Поліс на тры месяцы афармляць больш выгадна — ён каштуе 97 еўра.
У Літве мінімальны тэрмін для страхавання складае 15 сутак. Гэты поліс каштуе 21 еўра. Страхоўка на месяц каштуе 36 еўра.
З 1 чэрвеня замежныя страхавыя кампаніі могуць змяніць тарыфы, мяркуе супрацоўнік беларускай кампаніі.
Паводле цяперашніх правіл, у кіроўцы аўто на беларускіх нумарах памежнікі патрабуюць «зялёную карту», аформленую ў беларускай страхавой кампаніі.
Яе наяўнасць перастануць кантраляваць з 00:00 17 траўня, паведамілі ў Дзяржпагранкамітэце.
Двухбаковае пагадненне па ўзаемным прызнанні «Зялёнай карты» з Беларуссю разрываюць усе краіны Еўрасаюза і Ісландыя, Нарвегія, Швейцарыя і Вялікабрытанія.
Таксама з 1 чэрвеня перастануць прызнаваць полісы, аформленыя ў Расіі, а ў Расіі не будуць дзейнічаць полісы з Еўрасаюза. Скасаванне пагадненняў звязанае з агрэсіяй Расіі ва Украіне і ўдзелам у ім Беларусі.
Двухбаковыя пагадненні захаваюцца з Албаніяй, Андорай, Босніяй і Герцагавінай, Іранам, Марока, Малдовай, Расіяй, Паўночнай Македоніяй, Сербіяй, Тунісам, Турцыяй і Чарнагорыяй. Спатрэбіцца страхоўка з пазнакай «усе краіны».
Чытайце таксама:
Тры памяшканні ў будынках са статусам гісторыка-культурнай каштоўнасці ў самым цэнтры Гродна і яшчэ адно…
Мінчанка Вера Таратухіна тры гады кіравала папулярным у Гродне вінным барам "Чырвоным па белым" (пазней…
Будынак былой сінагогі ў Слоніме выкупіў дырэктар расійскага акцыянернага таварыства “Агенцтва Развіцця Перспектыўных Тэхналогій” (АРПТ).…
У Лідзе прайшлі масавыя затрыманні на дзяржпрадпрыемствах і прыватных фірмах. Трох гродзенцаў будуць судзіць завочна.…
Ураджэнца Гродна кампазітара Ежы Максімюка ўзнагародзілі найвышэйшай дзяржаўнай узнагародай Польшчы – ордэнам Белага Арла. Гэта…
На “Гродна Азот” 2 траўня 2024 года адбылася атака кіберпартызанаў. З сістэмы выдалілі дадзеныя сотняў…