Крымінальную справу супраць Станіслава Сямашкі закрылі. Ён рыхтуецца будаваць спа-гатэль каля Каробчыц

Крымінальная справа супраць Станіслава Сямашкі закрытая. У інтэрв'ю 015.by гродзенскі прадпрымальнік абвінаваціў ва ўсіх праблемах падрадчыка ТАА «Гарадское будаўніцтва» і распавёў пра планы на будучыню.

Сямашка: «Тэрміны работ парушаліся»

Пры выбары падрадчыка для рэканструкцыі дома на Калючынскай пад апарт-гатэль Станіслаў Сямашка звярнуўся ў ТАА «Гарадское будаўніцтва». Асноўныя моманты, у тым ліку і цэнавыя пытанні, узгаднілі ў кантракце. Было выразна прапісана, што Сямашка фінансуе ўсё, што закупляе ТАА «Гарадское будаўніцтва» для аб’екта. Кошт матэрыялаў быў уключаны ў агульную суму дамовы.

— З самага пачатку ТАА «Гарадское будаўніцтва» ў якасці Генеральнага падрадчыка працэс на аб’екце наладзіла абсалютна неграматна. Будоўля вялася бессістэмна, тэрміны выканання работ парушаліся. На пляцоўцы былі горы смецця і хламу, работы выконвалі нейкія дзіўныя людзі, мала падобныя да прафесіяналаў. Я глядзеў на ўсё гэта і трываў да таго часу, пакуль да мяне не прыехаў мэр з пытаннем, чаму будаўніцтва гасцініцы ідзе так павольна, — кажа Станіслаў Сямашка.

Выгнаў брыгаду з аб’екта

На пасяджэнні ў гарвыканкаме ў прысутнасці прадстаўнікоў ТАА «Гарадское будаўніцтва» Сямашка прама заявіў, што памыліўся ў выбары падрадчыка, таму скасаваў кантракт і выгнаў Генпадрадчыка і яго брыгаду з аб’екта.

— Зыходзячы са свайго вопыту, заклікаю ўсіх быць вельмі асцярожнымі ў працы з кампаніяй ТАА «Гарадское будаўніцтва». Я адправіў туды чатыры афіцыйныя лісты з просьбай забраць усе, пакінутае імі на пляцоўцы. Ніхто не адрэагаваў. Гарадскія ўлады мне далі прадпісанне прыбраць пляцоўку і навесці парадак у цэнтры Гродна, — кажа бізнесовец.

Сямашка: «Я не прыняў гэты „дэкор“, для мяне гэта смецце»

Пастаўка дэкору ад ІП Прыходзька, па словах прадпрымальніка, прыйшла бракаванай, не ўпакаванай, бруднай, без накладных. Дэкор выгрузілі прама на гару смецця ля аб’екта. Сямашка настойваў, каб дэкор з ім папярэдне абмеркавалі, чаго не было зроблена. Ён кажа, што Вячаслаў Радзюкевіч, намеснік дырэктара ТАА «Гарадское будаўніцтва», захацеў зэканоміць і замовіў дэкор у Прыходзькі без ўзгаднення з гаспадаром гатэля. Калі новыя будаўнікі наводзілі парадак на пляцоўцы, частку будаўнічага смецця з дазволу Сямашкі загрузілі ў машыну і адвезлі на дачу брыгадзіра.

— Я не прыняў гэты «дэкор», для мяне гэта смецце. Вось, дзе соль. Мне не было дзе ўсё гэта захоўваць, хай забіраюць людзі. Я ўсё жыццё будую і змагаюся з цяжкасцямі. А калі чалавек нешта робіць, ёсць зайздрасць. Самы вялікі ўрок, які я маю з усяго гэтага, гэта тое, што буду спадзявацца толькі на сябе, праектаваць і будаваць усё сам. Такіх каманд, як ТАА «Гарадское будаўніцтва», у жыцці больш не прызнаю. Я больш за 30 гадоў у прадпрымальніцтве. З кожным чалавекам разлічыўся. Падрадчыкаў, якія выконваюць абавязацельствы і тэрміны, я ўзнагароджваю прэміямі. Але з таго, хто не выконвае дамоўленасці, вылічваю шкоду. У гэтым падыходзе многія прадпрымальнікі бяруць з мяне прыклад, — прызнаецца гаспадар гатэля.

Аб’ект у Каробчыцах па ініцыятыве прэзідэнта

Нядаўна Сямашка купіў на аўкцыёне права доўгатэрміновай арэнды пустога ўчастку зямлі побач з апарт-гатэлем на Калючынскай.

— Я там прыгожы будынак пабудую. Архітэктары яго ўжо распрацавалі. Я ўсё вывучыў, пабудую вельмі хутка, за паўтэрміна, — абяцае Станіслаў Сямашка.

Дадаткова, вядомы гродзенскі гатэльер па ініцыятыве прэзідэнта ўзяўся за праектаванне і будаўніцтва грандыёзнага аб’екта ў Каробчыцах, дзе на 5 гектарах зямлі праз 2−3 гады з’явіцца «GRODNO HOTEL-SPA VILLAGE». На двух азёрах сярод бяроз размесціцца мноства драўляных катэджаў гасцінічнага тыпу са спа-басейнамі, камінам, добраўпарадкаваннем для адпачынку. Там можна будзе здымаць жыллё на доўгі тэрмін, а ў перспектыве і купляць дамы ў прыватную ўласнасць. Станіслаў Сямашка запрашае да супрацоўніцтва зацікаўленых інвестараў.

---

Пра крымінальную справу супраць Станіслава Сямашкі стала вядома ў лістападзе 2018 года. Пацярпелым праходзіў 35-гадовы прадпрымальнік з Фаніпаля Георгій Прыходзька, які стварыў для новага аб’екта Сямашка дэкор фасадаў. Дамова з падрадчыкам «Гарадское будаўніцтва» была вуснай.

Прыходзька ацаніў дэкор у крыху больш за 23 тыс. рублёў. Спачатку яму заплацілі 14 тыс. перадаплаты, а потым Сямашка праз суд дамогся вяртання яму гэтых грошай з працэнтамі. Адгружаны, але непатрэбны ўладальніку гатэля дэкор Прыходзьку не вярнулі. Потым дэкор знайшлі паламаным на лецішчы пад Шчучынам.

Паводле адной з версій, Сямашка спадзяваўся ўпрыгожыць свой будынак больш багата, чым яму дазваляў узгоднены праект, таму і замовіў дэкор. Аднак унесці змены не ўдалося і дэкор стаў непатрэбным. Сямашку затрымлівалі ноччу ў сярэдзіне кастрычніка, арыштавалі банкаўскія рахункі і дом. Прадпрымальнік адразу ж заяўляў, што справа заведзена прадузята і незаконна.