МУС: «Усе непаўналетнія, якія сядзяць за наркотыкі, падпадуць пад амністыю»

Да ўсіх 83 непаўналетніх, якія адбываюць пакаранне паводле 328 артыкула аб распаўсюдзе наркотыкаў, будзе прыменена амністыя. Пра гэта заявіў журналістам палкоўнік міліцыі Генадзь Казакевіч, начальнік галоўнай управы па наркакантролі і супрацьдзеянні гандлю людзьмі Міністэрства ўнутраных спраў Беларусі, паведамляе “Радыё Свабода”.

Колькі з 83 падлеткаў ужо сёлета выйдзе на волю, а якой частцы тэрмін пакарання будзе скарочаны на 2 гады, міліцыянт не паведаміў. Паводле Генадзя Казакевіча, амністыю прыменяць да 1600 вязняў, асуджаных па 328 антынаркатычным артыкуле.

«Ужываюць інструкцыі спецслужбаў з 30-х гадоў»

Генадзь Казакевіч прызнаў, што сёлета за першыя 9 месяцаў году падлеткі здзейснілі ўдвая больш злачынстваў, звязаных з наркотыкамі, чым у адпаведны перыяд мінулага году. Прычын гэтаму некалькі, мяркуе палкоўнік Казакевіч. Большасць гэтых падлеткаў былі ўцягнутыя ў распаўсюд наркотыкаў праз інтэрнэт, чвэрць такіх злачынстваў учынена ў складзе арганізаваных груп, паведаміў міліцыянт. Пры гэтым Генадзь Казакевіч не пагадзіўся з тлумачэннем, што маладыя людзі ў асноўным становяцца ахвярамі сваёй неінфармаванасці.

«Гэта няпраўда, што яны не разумеюць, куды іх запрашаюць, калі бачаць аб’явы пра добрую працу кур’ерам. У 90% выпадкаў падлеткі добра ўсведамляюць, што гэта праца „мінёра“ і гэта злачынства», — мяркуе палкоўнік Казакевіч.

Паводле міліцыянта, працадаўцы маладых наркадылераў не хаваюць ад іх, што прапануюць ім злачынны бізнес, але пры гэтым абяцаюць навучыць, як хавацца і пазбегнуць адказнасці.

«Нават ужываюць інструкцыі спецслужбаў 30-х гадоў», — заўважыў палкоўнік міліцыі.

Новы фактар, паводле Казакевіча, — тое, што частка моладзі ставіцца да распаўсюду наркотыкаў «як да бізнесу», і таму звычайныя прафілактычныя захады на іх не дзейнічаюць.

«Ёсць падлеткі, якія асэнсавана пайшлі на гэтае злачынства, для іх галоўнае — карыслівы матыў, атрыманне прыбытку. Мы канстатуем, што для гэтай катэгорыі моладзі звычайныя прафілактычныя захады не дзейнічаюць. Цяпер мала павесіць інфармацыю пра адказнасць у школе ці пагаварыць на гэтую тэму на бацькоўскім сходзе. Словы павінны дайсці, быць зразумелымі», — заўважыў Генадзь Казакевіч.

Міліцыянт прапанаваў працаваць сумесна з актывістамі грамадскіх арганізацый, у тым ліку з тымі, якія выступаюць за іншыя падыходы ў вырашэнні праблемы наркотыкаў, як рух «Маці 328».

Раней на кантакт з актывісткамі гэтай арганізацыі ў МУС ішлі неахвотна. Старшыня руху «Маці-328» Ларыса Жыгар вітала прапанову больш шчыльнага супрацоўніцтва з праваахоўнікамі. Але на інфармацыю пра ўжыванне амністыі да ўсіх непаўналетніх вязняў-328 Ларыса Жыгар глядзіць скептычна.


Старшыня “Матчын рух 328” ідзе ў дэпутаты


«Што 100% амністыя ў іх будзе, не веру, бо сярод падлеткаў ёсць і 4 частка 328 артыкула, з якой справы аб амністыі адразу адкладаюць убок. Мы галадоўку праводзілі, каб гэтую 4 частку знялі зусім, бо там вельмі няпэўныя крытэры, шмат спраў прыцягнутыя да гэтай часткі штучна, бяздоказна, але нічога пакуль не ўдаецца.

Да таго ж некаторыя непаўналетнія вязні-328 маюць спагнанні за парушэнні парадку ў калоніі, што пазбаўляе іх шанцаў на амністыю. „Маці-328“ скардзіліся на такую практыку ў прадстаўніцтва ААН у Беларусі, але станоўчага выніку гэта не дало.

Што да амністыі да дарослых вязняў-328, дык яна, па маіх звестках, ідзе пакуль вельмі марудна. Да тых, каго асудзілі за час пасля амністыі па 328 артыкуле, тым 2 гады здымаюць, але не ведаю яшчэ ніводнага факту, каб каго вызвалілі з калоніі», — пракаментавала сітуацыю Ларыса Жыгар з руху «Маці-328».

«Мы закрылі 400 сайтаў»

Чаму, прыкладаючы вялікія намаганні, не ўдаецца аператыўна закрываць сайты, якія прапануюць працу па распаўсюджванні наркотыкаў і псіхатропаў? Паводле палкоўніка Генадзя Казакевіча, Міністэрства ўнутраных спраў накіравала ў Мінінфармацыі 399 паведамленняў аб абмежаванні доступу да сайтаў, на якіх была змешчана незаконная інфармацыя пра наркотыкі.

«Гэтыя захады дзейнічаюць, але цяпер час інтэрнэту», — сказаў Генадзь Казакевіч і адзначыў, што закрываць інтэрнэт, як у Паўночнай Карэі, немагчыма.


15 000 асуджаных. Як змяніць артыкул 328, абмеркавалі юрысты і маці пакараных


Паводле Генадзя Казакевіча, з 2014 году ў паўтара раза скарацілася колькасць нарказлачынстваў, атручэнняў псіхатропамі стала ў 4 разы меней, у 1,7 раза меней зафіксавана перадазовак са смяротным вынікам. Пры гэтым наркапагроза не стала меншай: у параўнанні з тым жа 2014 годам наркотыкаў і псіхатропаў вымаюць удвая больш, прызнаў міліцыянт.

На двух былых супрацоўнікаў наркакантролю завялі справы

Пераважная большасць наркотыкаў на рынку краіны — прывазны тавар. Наркотыкі вязуць з Расіі, Кітаю, Еўропы, Афрыкі. Ці даходзяць у праваахоўнікаў рукі не толькі да дробных гандляроў і закладчыкаў наркотыкаў, але і да буйных наркадылераў, якія дзейнічаюць у звязцы з замежнымі злачынцамі?

Начальнік управы наркакантролю МУС Генадзь Казакевіч паведаміў, што сёлета было выяўлена і перакрыта 20 каналаў паставак наркотыкаў з-за мяжы. У судах прайшлі і ідуць цяпер гучныя працэсы, на лаве падсудных апынуліся дзясяткі абвінавачаных у арганізацыі распаўсюду наркотыкаў. У якасці прыкладу палкоўнік Казакевіч прывёў працэс над 37 наркадылерамі, які нядаўна завяршыўся ў Мінскім гарадскім судзе, а праходзіў на «Валадарцы».

Сярод асуджаных за распаўсюд наркотыкаў аказаўся і былы прапаршчык міліцыі.

«Важна не тое, што ён міліцыянт, а тое, што мы гэтага не хаваем і адказнасці ён не пазбег», — сказаў Генадзь Казакевіч і паведаміў журналістам пра завядзенне крымінальных спраў на двух былых супрацоўнікаў управы наркакантролю.

Падчас прэсавай канферэнцыі, якая прайшла 16 кастрычніка ў Міністэрстве ўнутраных спраў, аб выкананні дзяржаўнай праграмы па супрацьдзеянні наркотыкам распавялі таксама прадстаўнікі міністэрстваў аховы здароўя, адукацыі, а таксама працы і сацыяльнай абароны.

Spelling error report

The following text will be sent to our editors: