Фотакалендар на 2021 год «Гэта МЫ» ўжо адзняты. Там будуць знаёмыя краявіды, беларускія сюжэты і героі ў нацыянальных касцюмах. У падборку ўвайшлі 12 фатаграфій. Частку з іх чытачы Hrodna.life ужо бачылі. Пра тое, што засталося за кадрам, распавяла Наталля Марозава, жонка і калега фатографа. У гэтым праекце яна здымала фота- і відэа бэкстейдж.

Сапраўдная Містыка і апошняя Кропля (цярпення)

Для гэтага кадра, па задумцы Марозава, конь павінен быў стаць на дыбкі. Пару гадзін угавораў - і ён застыў у паветры. Думаеце, гэта містыка? Так і ёсць. Гэты конь — Містыка. Здымка праходзіла ў вёсцы Новікі, каля Ласосна.

Сергей Морозов календарь Гэта МЫ 2021
Конь Містыка і наезніца Надзя

Вось як успамінае пра здымкі Наталля:

«Містыка — белы з чорнымі плямамі-яблыкамі конь. У Містыкі на грыве роўныя чорныя касічкі. Выглядае прыгожа. Надзя [наезніца — рэд.] прызнаецца, што ўжо «задубела», але для кадра імкнецца не дрыжаць. Конь прымае з рук пачастунак і радасна б’е капытом. Але не скача. Яшчэ пару дубляў і кадр словлен.

На фотасесію выходзіць сціплы конь Кропля — з Андрэем і трапяткім сцягам на спіне. Кропля вельмі саромеецца. Ёй таксама нясуць пачастунак і стараюцца не палохаць. «Яна па дыяганалі не ходзіць? — цікавіцца Сяргей. Згулялі б у шахматы. Поле ёсць, коні таксама».

Здымак з Містыкай і Кропляй будзе ілюстраваць жнівень.

Самая рамантычная фотасесія календара

«Прыгожая пара Коля і Каця — захапляюцца псіхалогіяй і байкамі. З байкерамі наогул прыемна мець справу, прыязней за іх толькі грузіны. Яшчэ ў нашай камандзе сёння візажыст Марыя. Яна не пабаялася працаваць на паляне ў лесе».

«Георгій Антонавіч, які даў нам лодку для фотасесіі, зараз вычэрпвае з яе ваду. Добра, што не я плыву на гэтым «Тытаніку», — так распавядае пра здымкі ў азёрах Наталля.

Гэтым разам на макіяж і прыстрэлку сышло паўдня. Усё роўна трэба было дачакацца змяркання. На задуманай фатаграфіі - сюжэт для студзеня, хоць здаецца, што цяпер паплывуць па вадзе купальскія вянкі. Але гэта — магія фота. Насамрэч на вуліцы позняя восень.

Сергей Морозов календарь Гэта МЫ 2021
Гэты здымак зроблены для студзеньскай старонкі календара «Гэта — МЫ»

Мадэлямі для фатаграфій календара «Гэта МЫ» сталі гродзенцы і гродзенкі. З рэквізітам і тэхнічнай падтрымкай дапамаглі мясцовыя майстры і рамеснікі. Каляндар выйдзе пры падтрымцы Hrodna.life. Атрымаць яго можна будзе ў рэдакцыі ці ў фатографа за данат. Так вы падтрымаеце аўтара і незалежнае медыя. Каб не прапусціць новыя праекты рэдакцыі, станьце падпісчыкамі медыя на краўдфандынгавай платформе Талака.

Боты-нескараходы і здымкі на Нёмане

«Ідзем уздоўж Нёмана, спускаемся да ракі па лесвіцы, — піша Наталля. — Сяргей апранае рыбацкія боты і рыхтуецца да здымкі. Марыя — акторка. А сёння — мадэль у нацыянальнай вопратцы з вянком на галаве. Тут вельмі маляўніча і халодна. Сяргей на руках нясе Марыю на сярэдзіну ракі і ставіць на камень.

Сергей Морозов календарь Гэта МЫ 2021
Маша не ўмее плаваць. Але экстрэмальная здымка ёй спадабалася. Гэта фатаграфія для лістападаўскай старонкі

Фотасесія доўжыцца нядоўга, але весела. Потым Сяргей тупае да Марыі, закідвае яе на плячо і нясе да берага".

«Дзякуй нябеснай канцылярыі!»

Сяргей Марозаў распавёў, што адна з «фішак» спантанна арганізаванага праекта — зняць за адзін месяц усе часы года. Але ўсё склалася вельмі ўдала.

Сергей Морозов календарь Гэта МЫ 2021
Нават надвор’е падладжвацца пад патрэбныя ўмовы. Калі былі запланаваны «зімовыя» здымкі, ішоў снег. Калі патрэбныя былі летнія віды — стаялі ясныя дні.

«Бывала, што раніцай дождж і моцны вецер. А пасля абеду, калі прызначаныя здымкі, станавілася ціха і выглядала сонца. Ці адразу пасля „летніх“ фотасесій надвор’е псуецца, а нам для наступных запланаваных здымак так і трэба было, — кажа Сяргей Марозаў. — Дзякуй за гэта нябеснай канцылярыі!»


Рэдактарка спецпраектаў, рэпарцёрка, фатографка і відэографка. У журналістыцы з 2015 года. Удзельнічала ў распрацоўцы канцэпцыі рэбрэндынгу выдання «Твой стыль» і стварэнні «Hrodna.life». Паводле адукацыі Ірына інжынер-механік, таму не цураецца тэхнічна-складаных фарматаў.

Найчасцей піша сацыяльныя рэпартажы. Любімая справа — вынаходзіць ровар і ставіць амбітныя мэты для ўсіх, хто не паспеў схавацца.

Матэрыялы Ірыны Новік былі адзначаны дыпломамі многіх конкурсаў.