Фота: Уладзімір Аплевіч
У будынку былога Палаца культуры тэкстыльшчыкаў у Гродне размесцяць інтэрактыўны музей. Ён будзе прысвечаны гісторыі Гродна і Гродзеншчыны, піша БелТА са спасылкай на ўпраўленне культуры Гродзенскага аблвыканкама.
Зараз у будынку на Савецкай плошчы працягваецца рэканструкцыя. Супрацоўнікі Гродзенскага гісторыка-археалагічнага музея распрацоўваюць праекты будучых экспазіцый.
«Плануем стварыць нясумны музей, дзе разам з унікальнымі экспанатамі будуць арганізаваныя інтэрактыўныя зоны з сэнсарнымі экранамі і іншымі аўдыёвізуальнымі сродкамі. Задума ў тым, каб прыцягнуць турыстаў і жыхароў горада аўтэнтычнымі і рэдкімі прадметамі, якія адлюстроўваюць соцыум і найважнейшыя эпахальныя падзеі ў даступных і лёгка ўспрыманых вобразах і формах», — распавёў дырэктар Гродзенскага гісторыка-археалагічнага музея Юрый Кітурка. Ён падкрэсліў, што музей будзе цікавы наведвальнікам розных узростаў, прычым не толькі турыстам, але і самім гарадзенцам.
Новая экспазіцыя музея адлюструе гісторыю горада і рэгіёну, у ёй будуць прадстаўлены найбольш каштоўныя прыродазнаўчыя калекцыі гісторыка-археалагічнага музея. У цэнтры адной з залаў на першым паверсе размесціцца шкілет маманта ў натуральную велічыню. Пры яго стварэнні выкарыстаюць астанкі жывёл часоў палеаліту, знойдзеныя на Гродзеншчыне.
Гістарычная экспазіцыя, прысвечаная гораду, пакажа, напрыклад, жыццё рынкавай плошчы Гродна і іншых мястэчак рэгіёну і тое, як яна змянялася на працягу некалькіх стагоддзяў. У цэнтры ўвагі і Нёман, некалі адна з галоўных суднаходных артэрый, і першая ў Беларусі чыгунка, якая праходзіла праз Гродна. Аб гэтым раскажуць маштабныя дыярамы, інтэрактыўныя экраны і ўнікальныя экспанаты.
Адкрыецца ў музеі фотасалона XIX стагоддзя, дзе можна будзе зрабіць фота на памяць у рэтра-інтэр'ерах. Госці пабываюць на вуліцах міжваеннага Гродна, не застануцца без увагі і ваенныя тэмы. Сваё адлюстраванне ў экспазіцыі з дакументамі, фатаграфіямі і макетамі знойдуць падзеі вайны 1812 года, Першай сусветнай і Вялікай Айчыннай войнаў.
Ва ўпраўленні культуры аблвыканкама распавялі, што ў абноўленых залах Старога Замка ў Гродна адкрыюцца новыя тэматычныя экспазіцыі, прысвечаныя найбольш значным эпохах і людзям у гісторыі замка.
«Пачаліся рамонтныя работы і ў правым крыле Новага замка, раней яго займала абласная бібліятэка. Цяпер жа ўвесь каралеўскі палац стане музейнай пляцоўкай. На вызваленых плошчах плануем размясціць мастацкі музей, дзе будуць экспанавацца працы вядучых мастакоў рэгіёну і найбольш значныя карціны з фондаў гісторыка-археалагічнага музея», — адзначылі ва ўпраўленні культуры. Такое рашэнне, як плануецца, прыцягне ў мастацкі музей больш наведвальнікаў, у тым ліку і турыстаў, якія ходзяць у комплексныя экспазіцыі ў Новым замку.
У АУС Гродна сфармавалі спісы найбольш актыўных футбольных заўзятараў і "дэструктыўна настроеных грамадзян". Туды ўвайшло…
Да 1 траўня ў Гродне адкрыюць амбулаторыю ў Грандзічах, уключаць фантаны. Само свята пачнецца з…
Сілавікі знайшлі чатырох непаўналетніх у Гродне і вобласці, якія распаўсюджвалі экстрэмісцкія матэрыялы. Пра гэта напісана…
На "Гродна Азот" усё часцей спрацоўвае пажарная сігналізацыя - у параўнанні з першым кварталам мінулага…
З 21 красавіка на маршруце Гродна-Мінск большасць маршрутак заменяць кітайскімі аўтобусамі Zhong Tong. Транспарт закуплялі…
Зараз праз памежныя пераходы ў Мядзінінкай (з беларускага боку Каменны Лог) і Шальчынінкай (Беняконі) можна…