Мытня Літвы канстатуе — колькасць «забытых» грошай у дакументах пры праходжанні мяжы расце з кожным годам. Лідзіруюць па «непамятлівасці» беларусы. Пра гэта паведамляе прэс-служба літоўскага ведамства, піша TUT.BY.

Часцей за ўсё хабар прапануюць кіроўцы, якія «выпадкова» забываюць пра банкноты па 5 ці 10 еўра ў сваіх дакументах, хоць аднойчы літоўскага мытніка спрабавалі падкупіць квіткамі на канцэрт.

У ведамстве таксама распавялі, якія пункты пропуску лідзіруюць па «забытых» грошах. У мінулым годзе часцей за ўсё літоўскіх мытнікаў спрабавалі падкупіць ў пункце пропуску «Каменны Лог — Мядзінінкай» — 253 разы. Гэта цалкам вытлумачальна, паколькі ён з’яўляецца найбуйнейшым на беларуска-літоўскай мяжы. 128 спробаў даць хабар зафіксавалі на «Прывалцы — Райгардас», на «Беняконі - Шальчынінкай» — 110 выпадкаў, у пункце пропуску «Катлоўка — Лаварышкес» — 46 выпадкаў.

Часцей за ўсё грошы ў дакументах «забываюць» грамадзяне Беларусі - 357 выпадкаў, радзей расіяне — 64 спробы і ўкраінцы — 37 выпадкаў. Аднак у мытні адзначылі, на «непамятлівасць» пакутуюць таксама літоўцы і палякі.