Папярэднія зьвесткі перапісу насельніцтва будуць даступныя карыстальнікам у лютым 2020 году. 6 лістапада быў апошні дзень кантрольнага абыходу кватэраў перапісчыкамі ў межах агульнанацыянальнага перапісу-2019. Дэталізаваную разьбіўку дадзеных плянуецца запусьціць недзе да верасьня 2020 году, па сельскагаспадарчаму апытальніку — да ліпеня 2021 году, піша svaboda.org.

— У выпадку, калі на пытаньні «Ваша родная мова (мова, засвоеная першай у раньнім дзяцінстве)» і «На якой мове Вы звычайна размаўляеце дома», рэспандэнт адказваў «трасянка», то гэты адказ і заносіўся перапісчыкам у пляншэт. У слоўніку моваў, які выкарыстоўваецца для кадаваньня адказаў рэспандэнтаў на пытаньні аб мовах, адказ «трасянка» мае самастойны код, — растлумачыла Прэсавая сакратарка Белстату Тацьцяна Лапкоўская.

Пасьля таго, як перапісчык правёў апытаньне па адрасе і націснуў на экране пляншэта кнопку «Адправіць», усе перапісныя аркушы па дадзеным адрасе аўтаматычна кадзіраваліся, пасьля чаго закадаваныя перапісныя аркушы ў аўтаматычным рэжыме па вылучаным канале сувязі адпраўляліся на сэрвэр Белстату. З пляншэту перапісчыка звесткі выдаляліся таксама ў аўтаматычным рэжыме.


«Аўтаматам ставяць роднай рускую мову»: Людзі абураюцца перапісам, у Белстаце не бачаць праблемы


— Ці ёсьць ускосныя ацэнкі, якая частка насельніцтва не была перапісаная па тых ці іншых прычынах — працоўная міграцыя, адмова ўдзельнічаць у перапісе і гэтак далей?

— У цяперашні час уся атрыманая падчас перапісу інфармацыя знаходзіцца на сэрвэры Белстату ў зашыфраваным выглядзе, таму правесьці якую-небудзь ацэнку не ўяўляецца магчымым. Па завяршэньні 6 лістапада 2019 году ў 21.00 кантрольнага абыходу адрасоў, выбраных выпадковым чынам (гэта ўсясьветная практыка), пачалася апрацоўка атрыманай інфармацыі, першым этапам якой будзе расшыфроўка запісаў, якія паступілі на сэрвэр Белстату. Пасьля гэтага зьявіцца магчымасьць праводзіць ацэнку.