Літва хоча запрасіць Лукашэнку на пахаванне Каліноўскага

У Вільні таксама спадзяюцца, што Беларусь дапаможа з канчатковай ідэнтыфікацыяй удзельніка паўстання 1863–1864 гадоў, піша Белсат.

8 красавіка ў Вільні прайшла прэсавая канферэнцыя па выніках даследавання парэшткаў лідараў паўстання 1863–1864 гадоў, знойдзеных на гары Гедыміна. Падчас яе стала вядома, што Літва плануе запрасіць прадстаўнікоў Беларусі, Украіны і Польшчы – у тым ліку вышэйшых кіраўнікоў гэтых краінаў – на ўрачыстае пахаванне паўстанцаў, якое адбудзецца ўвосень у капліцы на віленскіх могілках Росы.

«Мы глядзім на эпоху паўстання не як на літоўскую справу, а як на справу ўсяго рэгіёну, якая яднае, перадусім, Літву, Польшчу і Беларусь. Таму вельмі важна, што на афіцыйныя ўрачыстасці былі запрошаныя дэлегацыі з гэтых краінах. Мы таксама казалі аб магчымым удзеле латышскага боку», – кажа «Белсату» прафесар Альвідас Нікжантайціс з Інстытуту гісторыі Літвы.

Прафесар Рымантас Янкаўскас з Віленскага ўніверсітэту заявіў, што Беларусь магла б дапамагчы з канчатковай ідэнтыфікацыяй Кастуся Каліноўскага: менавіта на тэрыторыі нашай краіны пахаваны старэйшы брат Каліноўскага, Віктар. Паводле спецыяліста, Літва звярнулася да Беларусі з просьбай параўнаць ДНК парэшткаў, але афіцыйнага адказу пакуль не дачакалася.

Напрыканцы сакавіка беларускае МЗС заявіла, што цяпер вядзе перамовы з літоўскім бокам аб магчымасці даследавання старэйшага брата Каліноўскага і з’яўлення на мемарыяльных шыльдах паўстанцаў надпісаў па-беларуску.

«Было вырашана, што імёны будуць напісаныя на літоўскай, польскай і беларускай мовах, што падкрэслівае важнасць паўстання для ўсіх гэтых краін, усіх гэтых народаў», – заявіў сёння падчас выступу Міндаўгас Квяткаўскас.

Няўдзел беларускіх спецыялістаў у супольных з літоўскімі калегамі працах па дасладеванні парэшткаў паўстанцаў, на думку гісторыка Ігара Кузмініча, звязаны з тым, што Беларусь не можа вызначыцца, хто такі Каліноўскі.

Няўдзел беларускіх і польскіх археолагаў у раскопках прафесар Альвідас Нікжантайціс тлумачыць нашаму каналу тым, што знаходка парэшткаў была выпадковай: іх выявілі падчас рэканструкцыйных працаў на гары Гедыміна.

Падчас прэс-канферэнцыі археолаг Гіціс Грыжас з Літоўскага нацыянальнага музею нагадаў, што парэшткі і фрагменты 20 паўстанцаў былі знойдзеныя ў 14 ямінах. Усе яны былі мужчынамі ўва ўзросце ад 18 да 53 гадоў. Паводле археолага, яны былі пахаваныя без «належнай павагі»: кінутыя проста ў зямлю, некаторыя са звязанымі рукамі і мяшкамі на галовах, засыпаныя вапнай.

«Пасля правядзення медычных, антрапалагічных і генетычных даследаванняў парэшткаў мы ведаем, што сярод іх – астанкі генерала Зыгмунта Серакоўскага і Кастуся Каліноўскага, – распавёў журналістам міністр культуры Літвы Міндаўгас Квяткаўскас. – Гэта асаблівы гістарычны момант не толькі для Літвы, але і для Польшчы, Беларусі, усёй гістарычнай літоўскай дзяржавы, за якую змагаліся паўстанцы».

Літва хоча запрасіць Лукашэнку на пахаванне Каліноўскага

Каментары

Spelling error report

The following text will be sent to our editors: