Фота: lida.info
Амаль рэкорд — будаўнічая пляцоўка, якая расцягнулася на 90 кіламетраў. Сотні экскаватараў, грузавікоў і кранаў, больш за 300 рабочых, інжынераў і праекціроўшчыкаў. Да 2018 года траса М6 паміж Мінскам і Гродна атрымае першую катэгорыю і хуткасную мяжу ў 120 км/ч. Якой будзе новая магістраль і навошта «Гроднааўтадар» раіўся з навукоўцамі-біёлагамі - усе падрабязнасці аўтадарожнай рэканструкцыі ў рэпартажы «Беларусь 1».
Кожныя 24 гадзіны тут праязджае больш за 15 000 аўтамабіляў. І кожны год трафік дадае яшчэ 4%. Пабудаваная ў самым канцы 70-х траса М6 больш за 30 гадоў без капітальнага рамонту. Сёння гэта адна будпляцоўка даўжынёю амаль у 100 кіламетраў. Рэканструкцыя праходзіць адначасова на некалькіх участках М6, і да 2018 года будаўнікам трэба будзе зрабіць фактычна новую магістраль. У першую чаргу гэта адрэзкі з 57-га па 130-ы кіламетр і са 197-га па 211-ы.
Больш за 300 спецыялістаў з Гродна, Гомеля і Мінска працуюць 7 дзён на тыдзень. Сотні адзінак тэхнікі. Бліжэй да будоўлі перавозяць цэлыя заводы. Гэтыя мабільныя асфальтабетонныя фабрыкі выпускаюць каля 5000 тон дарожнага палатна ў суткі. Іх час наступіць крыху пазней, калі трасу падрыхтуюць да кладкі асфальту. Дарожнікі абяцаюць гнуткую і моцную магістраль. З 2018 года практычна на ўсім працягу М6 будзе новая мяжа хуткасці - 120 кіламетраў у гадзіну. Таму адна з задач — не дапусціць аварыйнасці на дарозе.
Валерый Венцковіч, генеральны дырэктар РУП «Гроднааўтадар»:
«Будуць уладкаваныя тры новыя транспартныя развязкі, якія дазволяць адназначна знізіць колькасць ДТЗ. На раздзяляльнай паласе будуць устаноўлены дэльтаблокі, якія будуць прадухіляць ў першую чаргу лабавыя сутыкненні, машыны не будуць трапляць на сустрэчную паласу нават пры самых дрэнных збегах абставін».
У інжынерных праектах, дарэчы, улічылі не толькі аўтамабілістаў, але і жыхароў лесу.
Цяпер гэтага не бачна, але ў чарцяжах праекціроўшчыкі зарэзервавалі гэты ўчастак дарогі для падземнага пераходу. Ён будзе асаблівым. Яго спецыяльна ствараюць, каб вадзіцелі і дзікія жывёлы больш не перасякаліся на трасе.
Ужо ў наступным годзе ў аленяў, ласёў і казуль з’явіцца свой эксклюзіўны канал міграцыі і, падобна, таксама першай катэгорыі.
Васіль Доўгань, генеральны дырэктар ААТ «Дарожна-будаўнічы трэст № 6 г. Гродна»:
«Мы хочам прымяніць новую тэхналогію — металічную арку замест жалезабетоннага пуцеправода. Для бяспекі руху ўвесь участак дарогі ў межах ляснога масіву агароджваецца сеткай з двух бакоў».
М6, дарэчы, не толькі транспартная артэрыя. Магістраль паміж сталіцай і абласным цэнтрам — цэнтр эканомікі рэгіёну.
Эксперты ўпэўнены, траса дадасць пераваг і для замежных транзітных патокаў.
Алег Барабанаў, дырэктар лагістычнай кампаніі: «Гэтая рэканструкцыя дазволіць, на мой погляд, прыцягнуць большы грузапаток, які прыйдзе пасля праз, у дадзеным выпадку, пункт пропуску „Брузгі“. Калі мы тут размешчаны на гэтай трасе, спадзяемся, што з павелічэннем грузапатоку павялічыцца і тая колькасць аўтатранспарту, які праедзе праз наш лагістычны цэнтр».
Пасля рэканструкцыі, як чакаюць эксперты, М6 увойдзе ў лік міжнародных дарог, якія злучаюць новы Вялікі Шаўковы шлях і заходнееўрапейскія магістралі, тым самым адкрываючы мяжы паміж Усходам і Захадам.
Найхутчэйшы рост цэн на харчовую прадукцыю ў Беларусі назіраецца ў Гродзенскай вобласці. За першы квартал…
Гродзенскіх школьнікаў прывялі ў ізалятар часовага ўтрымання. Гэта адбылося ў межах экскурсіі, паведаміла прэс-служба Упраўлення…
У цэнтры Гродна дабудоўваюць офіс IT-кампаніі “Афранс”. Ён будзе складацца з двух будынкаў на вуліцы…
Атрымаць тавары з-за мяжы павінна была рэлігійная місія Дабрачыннага каталіцкага таварыства «Карытас» Гродзенскай дыяцэзіі. Памежнікі…
На вуліцы 17 верасня, 59/3 можна набыць кватэру ў цалкам адрэстаўраваным будынку 1925 года пабудовы.…
У Гродне пачаўся рост цэн за арэнду кватэры на майскія святы. Гэта звязваюць з плынню…