Дадаць навіну

Сталі сведкамі падзеі?
Падзяліцеся!

Напішыце навіну

PROсэрвіс ад Наташ. Калядная казка ад чыноўніка

У дачкі было Аплаткавае спатканне ў школе. Калядная вечарына, калі так вам больш зразумела. Спачатку агульнашкольнае прадстаўленне ў актавай зале, потым у класах па сваёй праграме.

Прадстаўленне падрыхтавалі адзінаццацікласнікі і было яно проста на мегавысокім узроўні. Акторская гульня, сцэнарый, рэалізацыя. А найлепшы быў пасыл – быць людзьмі трэба сёння, Бог сапраўды нарадзіўся, важна не згубіць Яго за знешнімі атрыбутамі. Сур’ёзны такі, вельмі кранаючы і прымушаючы задумацца…

На вечарыне госці, сярод якіх прадстаўніца аблвыканкама. Не будзем тыкаць пальцамі, імя я памятаю, але не назаву. Далі ёй слова і тут…

“Дорогие ребята, педагоги, гости… С наступающим вас праздником. Какое прекрасное представление, актерская игра… Желаю вам поверить в Рождественскую СКАЗКУ… чтобы СКАЗКА… поверить… СКАЗКА… чудеса…”.

У такія моманты робіцца сорамна не таму, хто гаворыць, а таму, хто слухае. Я бачыла, як “дорогіе ребята” апусцілі галовы, каб вочы нічога не выдалі.

Цяпер пытанне, якое не дае мне спакою: што гэта – троль 80 узроўню? Моўны штамп ці загатоўка “речі” для ўсіх школ на Новы год (Каляды ж у школах нямодныя)? Адкрытая прапаганда атэізму? Версію “ляпнулася, а не падумалася” я разглядаць не буду – чалавек пры пасадзе.

Чаму я пішу пра гэта тут і пры чым тут сэрвіс? А хіба дзяржчыноўнікі не аплачваюцца нашымі падаткамі? Тады мы хочам адэкватнага цане сэрвісу. І няхай гэтая КАЗКА некалі стане праўдай. Давайце паверым у казку ад чыноўніка!

Пазнаёміліся мы ў далёкім 19… ды няважна. Мы – былыя аднакурсніцы, якія разам вучыліся і праз пару год пасля сканчэння ўніверсітэту (псіхалогія) пачалі працаваць разам.

Прафесія ў нас дзіўная. Калі нехта пытаецца, дык адразу неяк і няемка казаць… Выглядае так, што займаемся мы нечым непрыстойным. Насамрэч, мы – індывідуальныя прадпрымальніцы. Людзі з палёгкай уздыхаюць і пытаюцца “чым гандлююце”? Інтэлектам. Зразумела? Паясняем: мы – бізнес-трэнеры. З вузкай спецыялізацыяй на сферу гандлю і паслуг. Вядома, калі вам захочацца трэнінг “тайм-менеджменту”, то і такі зробім якасна, але лепш за ўсе мы праводзім трэнінгі продажу. Вучым прадаўцоў прадаваць у шырокім сэнсе гэтага слова.

Калі ты некага вучыш прадаваць, то і пакупніком звычайна “працуеш” прафесійна. Мы мімаволі ацэньваем, як нам прадавалі, што казалі, як усміхаліся. Уяўляеце сабе, якія пакуты хадзіць з намі, скажам, у рэстаран? Ніякага асабістага жыцця :)

Ідэя расказаць пра свае назіранні шырокай публіцы была даўно. Мы не прэтэндуем на аб’ектыўнасць, ды гэта і немагчыма, але каментары вітаем! Пра сэрвіс трэба гаварыць, абмяркоўваць, галасаваць за добры сэрвіс рублём. Мы часта кажам, што “калі ў нашыя магазіны, рэстараны, кавярні будзе прыемна зайсці, то ў гэтым будзе і частка нашай працы”.

А яшчэ нас можна замовіць за грошы ;) Мы прыйдзем як “таемны пакупнік”, праверым, ацэнім, абмяркуем, раскажам пра вынікі асабіста вам і не напішам тут. Гэта такі хітраваты паўжарт, але ж мы – прадпрымальніцы.