Халодныя напоі выдатна дапаўняюць спякотнае надвор’е, яркія колеры і духмяныя водары лета. У гродзенскіх кавярнях ёсць мноства адпаведных надвор’ю і настрою «ледзяных» прапановаў на любы густ і гаманец.
Кактэйлі ў «Basta Pasta»
У піцэрыі «Basta Pasta» можна знайсці кактэйлі з сумесі сокаў, сіропаў і лёду з фруктова-ягаднымі ўпрыгожваннямі. Самае складанае — выбраць, каторы пакаштаваць проста зараз.
Цана: каля 5 рублёў
Адрас «Basta Pasta»: вул. Перамогі, 35. Ёсць вялікая адкрытая пляцоўка, па вечарах — музыка.
Халодныя напоі ў «Нашай каве»
У «Нашай каве» можна пакаштаваць некалькі напояў, што спалучаюць каву з халоднымі дадаткамі - лёдам ці марозівам. Гэтым разам спрабуем той, што складаецца з неперамяшаных кавы і «Швэпса» — два кшталты горычы цікава спалучаюцца ў гэтым напоі. Ён бадзёрыць і ахалоджвае адначасова.
Цана халодных напояў у кавярні: каля 3 рублёў
Адрас «Нашай кавы»: вул. Замкавая, 11. Ёсць летняя тэраса.
Піна Калада ў «Раскошы»
У «Раскошы» наш выбар выпаў на Піна Каладу. Пераважае ў кактэйлі салодкі смак какоса. Вялікая шклянка кактэйлю з лёдам і саломкай дадуць магчымасць смачнай прахалоды.
Цана халодных напояў: ад 3 рублёў
Адрас «Раскошы»: вул. Савецкая, 7. Ёсць дзве тэрасы — ля галоўнага ўваходу на ходніку Савецкай і з тыльнага боку кавярні, з відам на вуліцу Кірава і турму.
Кактэйль на аснове морсу ў «Шэкспіры»
З меню тэатральнай кавярні «Шэкспір» выбралі халодны кактэйль на аснове морсу са свежымі замарожанымі ягадамі і лёдам. Сакавіты смак і прыгожы колер не падманулі чаканняў.
Цана халодных напояў: 2−2,5 рублі
Адрас: будынак Тэатра лялек, вул. Дзяржынскага 1/1. Ёсць адкрытая тэраса.
Вялікая шклянка кактэйля ў «КофейнЯ»
«КофейнЯ» прапануе халодныя напоі, што спалучаюць фруктовае пюрэ, сокі і колаты лёд. Кактэйль змешваеца ў шэйкеры і падаецца ў вялікай шклянцы.
Цэны халодных напояў: ад 3 рублёў
Адрас: вул. Савецкая, 5. Ёсць пара столікаў звонку, перад уваходам, на ходніку.
Кактэйль са смакам махіта ў «Хані-Кабані»
Шпацыр у Пышках можна дапоўніць візітам у грыль-бар «Хані-Кабані». Тут спрабуем кактэйль са смакам махіта. Свежая мята, вялікі кавалак лайма, газаваны «Спрайт» і лёд цалкам адпавядаюць летняму настрою і дораць паўгадзіны свежай прахалоды.
Цэны халодных напояў: 3 — 5 рублёў
Адрас: будынак інстытута біяхіміі, БЛК, 50. Ёсць вялікая тэраса пад тэнтам.
Фрэш у Еўраопце
Калі смага застане пад час закупаў у гіпермаркеце Еўраопт па вуліцы Дубко, 17, наталіць яе дапамогуць свежаадціснутыя сокі. Прапануюць сок з яблыкаў, морквы, апельсінў, салеры, а таксама іх спалучэнні.
Цана порцыі соку каля 2 рублёў. Пасля 20.00 дзейнічае зніжка 15%.
Сокавы бар знаходзіцца ў цэнтры гандлёвай залі. Прыемным дадаткам да напою будзе беларускамоўны сервіс.
