У драўляныя будынкі на Лермантава школа не вернецца: яна пераязджае на Дзяржынскага

Дапаможная школа № 1 (раней школа № 4) на вуліцы Лермантава, дзе вясной здарыўся пажар, пераязджае ў іншую навучальную ўстанову. Што далей будзе са старымі драўлянымі пабудовамі, зараз сказаць ніхто не можа, але школы там не будзе ўжо дакладна. Пра гэта Hrodna.life распавялі ў аддзеле адукацыі Гродзенскага гарвыканкама.

У старой школе на Лермантава 18 красавіка загарэўся клас матэматыкі-інфарматыкі. Завуч арганізавала эвакуацыю ўсіх навучэнцаў і выкладчыкаў. Пажарным спатрэбілася 10 хвілін, каб патушыць агонь. Пасля пажару былі сапсаваныя кабінет і столь у калідоры. Планавалася, што гэта ўсё адновяць і ва ўстанове працягнецца навучанне. Але летам стала вядома, што школы на Лермантава больш не будзе. Зараз з будынкаў вывозяць мэблю і іншыя прадметы.

[irp posts="25 063″ name="Агонь супраць спадчыны: як Гродзеншчына страчвае ў пажарах каштоўнасць за каштоўнасцю"]

У аддзеле адукацыі Гродзенскага гарвыканкама распавялі, што ёсць заключэнне, паводле якога школе нельга знаходзіцца ў драўляных пабудовах. Дапаможная школа № 1 пераязджае на вуліцу Дзяржынскага ў школу-інтэрнат для дзяцей з парушэннямі зроку. Там будуць створаны ўсе ўмовы для новых навучэнцаў.

[irp posts="6375″ name=""Усэмка" на Базыліянскай: школа, якая памятае страшныя часы"]