Праграма «Нулявы кіламетр» апошнім часам выходзіць рэдка, але аўтарка Наталля Шматко заўсёды стараецца пацешыць гледачоў цікавымі і малавядомымі фактамі. Новы выпуск яе праграмы прысвечаны каралеўскай друкарні і гродзенскаму «вольнаму мастаку», а таксама нямецкім літаграфскiм станкам і адноўленню ігральных карт Лапіных. Пра тое, як ствараўся чарговы выпуск праграмы, Наталля распавяла Hrodna.life.
Выпуск, які прысвечаны гродзенскаму друку ў розныя часы, ствараўся на працягу двух месяцаў.
«Асноўная складанасць — гэта недахоп часу. А ўсё астатняе мы рабілі ў сваё задавальненне. Вельмі дапамаглі гродзенскія гісторыкі і мастакі, за што ім вялікі дзякуй, — распавядае Наталля Шматко. - Гэтым разам мы яшчэ больш пашырылі геаграфію здымак: каб паказаць працэс літаграфіі, прыйшлося ехаць у Беларускую дзяржаўную акадэмію мастацтваў. Але яно было таго варта. Бо распавядаць аб друку і не паказаць сам працэс — было б неабдумана. 500-гадоў таму Скарына выдаў першую кнігу — гэта сапраўды быў навуковы і духоўны прарыў. Але і ў нашым любімым горадзе былі не менш таленавітыя майстры, працавалі ўнікальныя прадпрыемствы, пра якія трэба ведаць і якімі трэба ганарыцца».
Большую частку праграмы Наталля расказвала аб былой фабрыцы ігральных карт Лапіных, у якой пасля вайны размяшчалася гродзенская літаграфія, а пасля фабрыка афсетнага друку. Не абыйшлі аўтары ўвагай і аднаўленне ігральных карт Лапіных, якім зараз займаюцца гродзенцы.
Тэлеверсію праграмы можна паглядзець у эфіры канала «Наш горад +» у 20.00 у суботу і нядзелю.
