Следства па справе выбуху пылапаветранай сумесі на Скідзельскім цукровым камбінаце прыняла рашэнне затрымаць і дапытаць начальніка цэха гатовай прадукцыі і яго намесніка ў якасці падазраваных у здзяйсненні злачынства, прадугледжанага арт. 428 (службовая халатнасць) Крымінальнага кодэкса. Пра гэта паведамілі ў прэс-службе СК.

Следчая група працягвае працаваць на тэрыторыі ААТ «Скідзельскі цукровы камбінат», дзе 25 лютага ў выніку выбуху пылапаветранай сумесі пацярпелі пяць працаўніц заводу, чатыры з якіх пасля памерлі ў шпіталях.

У цяперашні час праводзяцца паглыбленыя агляды сістэм аспірацыі і вентыляцыі. Па запыце беларускіх следчых на прадпрыемства прыбылі прадстаўнікі кампаніі-пастаўшчыка абсталявання з Польшчы, якая, у тым ліку, праводзіла пуска-наладачныя працы ў цэху гатовай прадукцыі.

Акрамя таго, да следчых дзеянняў у якасці спецыялістаў прыцягнутыя навукоўцы вядучых ВНУ краіны, а таксама эксперты арганізацый, якія спецыялізуюцца на ўстаноўцы, эксплуатацыі і праверцы тэхнічнага стану сістэм аспірацыі і вентыляцыі.