У выніку анлайн-таргоў, якія прайшлі 25−26 лютага, усе ўзнагароды набылі калекцыянеры за агульную суму 229 200 даляраў, паведамляе myfin.by. У прыватнасці, камандная залатая медаль Алімпіяды 1972 года ў Мюнхене была прададзеная за 66 тысяч долараў. Каманднае «золата» спаборніцтваў 1976 г. у Манрэалі ацанілі ў 57 600.
Мюнхенская індывідуальная залатая ўзнагарода за вольныя практыкаванні «сышла» за 52 800 «зялёных».
«Срэбра» за практыкаванні на брусах Алімпіяды ў Мюнхене прынесла 26 400 долараў. Столькі ж — «срэбра» за практыкаванні на бервяне ў Манрэалі.
[irp posts="13 152″ name="Вольга Корбут выставіла на аўкцыён свае алімпійскія медалі"]
Трэба заўважыць, што самай Вользе Корбут адыдзе не ўся сума. У яе, напрыклад, як мінімум уваходзіць так званы Buyer’s Premium- прэмія аўкцыённага дома.
На спартыўныя лоты гэтая прэмія ў Heritage Auctions устаноўлена ў памеры 20 адсоткаў. Гэта значыць, што «чыстая» сума — не 229 200, а 183 360 долараў.
Цікава, што ў скарбонцы ў славутай беларускай спартсменкі ёсць яшчэ адзін залаты алімпійскі медаль — за практыкаванні на бервяне ў Мюнхене.
Але ён не быў выстаўлены на аўкцыён. Як тлумачыцца на сайце, ўзнагарода «была скрадзеная з маскоўскага музея».
Дарэчы, на аўкцыён Heritage Auctions былі выстаўлены не толькі алімпійскія медалі Вольгі Корбут, але і дзясяткі іншых рэчаў, звязаных з яе спартыўнай кар’ерай.
Гэта ўзнагароды, заваяваныя на чэмпіянатах свету, першынстве СССР, іншых спаборніцтвах, бэйджы і пропускі, спартыўная куртка, першы атрыманы ў ЗША пашпарт.
У нядзелю, напрыклад, за 3 000 долараў быў набыты і гімнастычны касцюм, у якім спартсменка выступала перад публікай ў Лондане на Уэмблі ў 1973-м.
Як паведамляюць СМІ, Вольга Корбут цяпер жыве ў амерыканскім штаце Арызона, дае тут прыватныя ўрокі і час ад часу выязджае з турамі па ўсім свеце для папулярызацыі гімнастыкі.
У яе ёсць жаніх, якога завуць Джэй Шанфельдт.
Корбут і Шанфельдт патлумачылі журналістам, што продаж яе спартовых узнагарод — не адчайны крок у пагоні за грашыма. Хоць і прызналі, што сродкі не перашкодзяць.
Тым не менш, асноўнай прычынай яны назвалі імкненне быць бліжэй да прыхільнікаў гімнасткі, дазволіўшы ім стаць часткай гісторыі, якую яны таксама рабілі.
— Гэта — алімпійская гісторыя, і я хачу падзяліцца ёю з усім светам, — сказала Корбут.
Як пішуць медыі, пасля продажу мемарабілій на аўкцыёне алімпійская легенда вернецца да свайго ціхага і спакойнага жыцця ў мястэчку Скотсдэйл.
Вольга паведаміла, што ёй тут падабаецца.
— Заўсёды хацела свой гародзік, але ніколі не хапала часу, — прызналася яна. — А зараз буду займацца чым хачу, вырошчваць садавіну, зеляніну і насалоджвацца добрым надвор’ем.
