Буккросінг MOVABOX — сацыяльна-культурнага праекта кампаніі velcom у падтрымку беларускай літаратуры — дзейнічае з сярэдзіны лістапада. Пасля паспяховага старту ў Мінску 10 кніжных боксаў з творамі сучасных беларускіх пісьменнікаў з’явiлiся і ў іншых гарадах. Цяпер пагартаць старонкі добрых кніг на мове можна ў кавярнях Брэста, Віцебска, Гомеля, Гродна, Магілёва i Мазыра, паведамілі ў кампаніі velcom.
Буккросінг — абмен кнігамі паміж незнаёмымі людзьмі. Кожны можа пакінуць кнігу, якой хоча падзяліцца, у спецыяльна абазначаным месцы і замест яе ўзяць любую іншую. Па ініцыятыве кампаніі velcom боксы для буккросінгу, на якіх змяшчаюцца кнігі з творамі сучасных беларускіх аўтараў, усталяваныя ў папулярных кавярнях.
У Гродне адмысловыя кніжныя боксы з’явіліся ў кавярнях «Кафе Саунд» и «Проста кава».
Першымі сваё месца ў боксах занялi кнігі Людмілы Рублеўскай з цыкла аб прыгодах Пранціша Вырвіча — «Авантуры студыёзуса Вырвіча» і «Авантуры драгуна Пранціша Вырвіча». Менавіта творам гэтай пісьменніцы прысвечаны першы MOVABOX — унікальны набор, у які ўваходзяць кніга і звязаныя з ёй артэфакты. Атрымаць яго змогуць 20 шчасліўчыкаў, якiя пройдуць адпаведны тэст на сайце праекта www.movabox.by.
MOVABOX робіць акцэнт на творчасцi прадстаўнікоў сучаснай беларускай літаратуры. Таму ў боксах таксама прадстаўлены такія кнігі, як раман Юрыя Станкевіча «Паўночны вецер для спелых пладоў», зборнік літаратурных эсэ Андрэя Федарэнкі «Сечка», калекцыя літаратурных замалёвак ад Адама Глобуса пад назвай «Партрэты».
[irp posts="3850″ name=""Не разбіць, не спыніць, не стрымаць!" Урок «чытаем па-беларуску з velcom» прайшоў у Новым замку"]
«Творы сучасных беларускіх аўтараў сапраўды вартыя таго, каб іх чыталі і дзеці, і дарослыя — як вартая таго і беларуская літаратура ўвогуле. Стартам беларускамоўнага буккросінгу ў праекце MOVABOХ мы імкнемся дапамагчы кнігам прыйсці да свайго чытача, незалежна ад таго, жыве ён у сталіцы, дзе сёння засяроджаны асноўныя падзеі літаратурнага жыцця, ці ў іншых гарадах. Яшчэ адна наша мэта — паказаць усю разнастайнасць і шматграннасць беларускага літаратурнага працэсу. Спадзяемся, што праз некаторы час гэтая калекцыя папоўніцца не менш цікавымі экзэмплярамі - магчымасць зрабіць свой унёсак у развіццё праекта мае кожны», — адзначыў Вячаслаў Смiрноў, кіраўнік аддзела карпаратыўных камунікацый кампаніі velcom.
Кнігі сучасных аўтараў для беларускамоўнага буккросінгу прадстаўленыя кампаніяй velcom пры падтрымцы грамадска-культурнай кампаніі «Будзьма беларусамі!». Для тых, хто хоча палепшыць свой узровень валодання беларускай мовай ці ўзяцца за яе вывучэнне з самага пачатку, арганізатары дадалі у спіс кніг падручнік «20 крокаў да беларускай мовы» ад бясплатных курсаў беларускай мовы «Мова Нанова». Побач з кнігамі чытачы знойдуць таксама літаратурна-мастацкую перыёдыку — у прыватнасці, часопіс «Дзеяслоў».
