Хакейны «Нёман» працягвае сваю пераможную серыю. На гэты раз гродзенцы ўжо ў сябе дома абыгралі аднаго з лідараў чэмпіянату — мінскае «Юнацтва». Пераможная серыя каманды Сяргея Пушкова ўжо складае трынаццаць матчаў запар.

Гаспадары выдатна пачалі гульню, што ўласна і прынесла вынік. Ужо на 7-й хвіліне гродзенцы вялі з лікам 3:0. Чацвёртую шайбу «Нёман закінуў на 17-й хвіліне. Але праз хвiлiну «Юнацтва» здолела забіць гол прэстыжу і зрабіла гэта ў большасці.

У другім перыядзе гульня паміж супернікамі пайшла больш жорстка. Нягледзячы на вялікую колькасць кідкоў з абодвух бакоў, забіць камандам так і не ўдалося.

Старт трэцяга перыяду застаўся за «Юнацтвам». Каманда Міхаіла Захарава хутка адыграла дзве шайбы і, здавалася, зраўняе лiк. Але зрабіць гэта мінскай дружыне гродзенцы не далі. У самым канцы матчу, пасля таго як у «Юнацтва» зняла брамніка, «Нёман» забіў пятую шайбу, якая стала кропкай у матчы.

«Нёман» — «Юнацтва» 5:3 (4:1, 0:0, 1:2)

Галы:
00.46 1:0 — Дарафееў (Пасют, Лакканен)
05.13 2:0 — Баярчук (А.Маляўка, С.Маляўка)
06.17 3:0 — Пасют (Стэфановіч, Лакканен)
17.29 4:0 — Рэмезаў (Стэфановіч, Безайс)
18.17 4:1 — Захараў (Развадоўскі, Корса, — бол.)
41.08 4:2 — Туркін (Захараў, Парфеявец)
42.33 4:3 — Захараў (Корса)
59.21 5:3 — С.Маляўка (П.В.)

Пасля перамогі над «Юнацтвам» «Нёман» ізноў узначаліў табліцу. Зараз у актыве чырвона-чорных 54 ачкі. На другім месцы ідзе «Юнацтва», у якога на 1 ачко менш, а таксама гульня ў запасе.

Наступную гульню «Нёман» правядзе таксама ў Гродне. У суботу, 26 лістапада, гродзенцы будуць прымаць салігорскі «Шахцёр».